کراچی: چیف جسٹس سندھ ہائی کورٹ کے بیٹے اویس شاہ کے میبنہ اغوا پر گورنر اور وزیراعلیٰ سندھ نے نوٹس لیتے ہوئے شہر بھر کی ناکہ بندی کا حکم جاری کردیا،سیکیورٹی اداروں نے شہرکے داخلی و خارجی راستوں کی ناکہ بندی کردی۔
اس حوالے سے وزیراعلیٰ سندھ سید قائم علی شاہ نے قانون نافذ کرنے والے اداروں کو شہر بھر کی ناکہ بندی کا حکم دیا جس کے بعد سیکیورٹی کے تمام ادارے حرکت میں آگئے اور اویس شاہ کی بڑے پیمانے پر تلاش شروع کردی گئی۔ وزیر اعلیٰ کا کہنا ہے کہ اویس شاہ کی تلاش میں کوئی کسر نہ چھوڑی جائے۔
گورنر سندھ ڈاکٹر عشرت العباد خان نے بھی اویس شاہ کی بازیابی کے لیے تمام تر وسائل بروئے کار لاتے ہوئے ان کی بازیابی کا حکم دیا ہے۔
سندھ پولیس کے ترجمان کا کہنا ہے کہ مبینہ طور پر اویس شاہ کو اغوا کیا گیا،نو بج کر دس منٹ پر اویس شاہ کے اغوا کی اطلاع ملی، ان کی گاڑی کا نمبر اے زیڈ ٹی 535 ہے جو سپر اسٹور کے باہر سے کھڑی مل گئی، وزیراعلیٰ نے شہر بھر کی ناکہ بندی کا حکم دے دیا ہے جس کے تحت کراچی میں سیکیورٹی سخت کرتے ہوئے داخلی و خارجی راستوں پر چیکنگ سخت کردی ہے۔ترجمان نے مزید کہا کہ شہر سے باہر جانے والی ہر گاڑی کی تلاشی لے جارہی ہے۔
ایس یس پی رائو انوار کے مطابق سپرہائی وے، نیشنل ہائی وے سمیت شہر سے باہر جانے والی دیگر شاہراہوں کی چیکنگ سخت کردی ہے، ہائی ویز کے اطراف کچی آبادیوں میں سرچ آپریشن جاری ہے۔