The news is by your side.

Advertisement

جو ہوائیں اسلام آبادمیں چل رہی ہیں، اس کا اثر کراچی میں بھی نظرآرہا ہے ، مراد علی شاہ

کراچی : وزیراعلیٰ سندھ مراد علی شاہ نے وفاقی حکومت پرشدید تنقید کرتے ہوئے کہا عمران خان ملک کوآئین کےتحت نہیں چلا سکتے،حکومت کےجانے کاوقت ہو گیا ہے،جو ہوائیں اسلام آبادمیں چل رہی ہیں،اس کا اثرکراچی میں بھی نظرآرہاہے۔

تفصیلات کے مطابق وزیراعلیٰ سندھ مراد علی شاہ نے نوری آباد پاور پلانٹ ریفرنس میں احتساب عدالت سندھ میں پیشی کے موقع پر میڈیا سے گفتگو کرتے  ہوئے کہا کہ مردم شماری صحیح معنوں میں نہیں ہوئی ، سندھ کے دارالخلافہ کراچی میں بھی گنتی صحیح نہیں ہوئی۔

وزیراعلیٰ سندھ نے حکومت پر تنقید کرتے ہوئے کہا سندھ میں بجلی کے پراجیکٹ انہوں نے بند کردیئے، اس پربھی ہم نے درخواست کی تھی مگر ایجنڈے میں شامل نہیں، عمران خان کی حکومت ملک کوآئین کےتحت نہیں چلا سکتی، اس حکومت کے جانےکا وقت آگیا ہے۔

مراد علی شاہ نے کہا کہ سندھ حکومت نے انتیس مئی کو مردم شماری کو چیلنج کیا تھا، اس پر مشترکہ اجلاس نہیں بلایا، دھاندلی کیلئے کچھ کرنا ہے تو مشترکہ اجلاس ہے۔۔ معاملے کو آج کے اجلاس کے ایجنڈے میں ساٹھ ویں نمبر پر رکھا گیا ہے۔

ان کا کہنا تھا کہ یہ نااہل کم عقل لوگ آئین کی پاسداری نہیں کررہے، ان کو آئین اور قانون کی سمجھ نہیں ہے، مردم شماری کا فیصلہ پارلیمنٹ کے مشترکہ اجلاس میں ہونا ہے۔

وزیراعلیٰ سندھ نے کہا سنا ہے فون کالز آرہی ہیں کہ میں تو ڈوبوں گا تمہیں بھی لے ڈوبوں گا، جوہوائیں اسلام آبادمیں چل رہی ہیں اس کا اثر کراچی میں بھی نظرآرہاہے، ان لوگوں جو ماحول پیدا کیا ہے اللہ کرے مزید آگے نہ جائے۔

مراد علی شاہ کا مزید کہنا تھا کہ احتساب کا بیانیہ کامیاب ہوتا نظر نہیں آرہا ، سیاست میں آنے کیلئے بڑا دل چاہیے ،اب کمزور لوگ نہیں آتے، پیپلزپاٹی اپنے  ووٹر کے اشاروں پر چلتی ہے اور عوام کا اشارہ یہ ہے کہ ان حکمرانوں سےجان چھڑائی جائے۔

خیال رہے احتساب عدالت میں نوری آباد پاور پلانٹ ریفرنس کی سماعت ہوئی ، جس میں ملزمان کی کمرہ عدالت میں حاضریاں لگائی گئی تاہم وزیر اعلیٰ سندھ اوردیگرملزمان پر فرد جرم عائد نہ ہو سکی۔

Comments

یہ بھی پڑھیں