کراچی : وزیراعلیٰ سندھ مراد علی شاہ نے قیمتیں کنٹرول سے متعلق روزانہ کی بنیاد پر خود جانچ کرنے کا فیصلہ کرلیا۔
تفصیلات کے مطابق وزیراعلیٰ سندھ مراد علی شاہ نے مصنوعی مہنگائی اور ذخیرہ اندوزی کےخلاف کارروائی کی ہدایت کردی۔
وزیراعلیٰ سندھ نے قیمتیں کنٹرول سے متعلق روزانہ کی بنیاد پر خود جانچ کرنے کافیصلہ کرتے ہوئے ہدایت کی ہے کہ ڈپٹی کمشنرز متعلقہ ضلع میں اشیاکی قیمتوں کی نگرانی کریں۔
مراد علی شاہ نے پرائس کنٹرول کے لئے خصوصی فورس قائم کرنے کی ہدایت کرتے ہوئے کہا ہے ک بیورو آف سپلائی اینڈ پرائسز ڈپارٹمنٹ کو مکمل طور فعال رکھا جائے۔
وزیراعلیٰ سندھ کا کہنا تھا کہ دکانوں، اسٹالز، بازاروں پر پرائس لسٹ آویزاں کی جائے، دکانداروں کو پریشان کرنا ہمارا مقصد نہیں لیکن قیمتوں کو کنٹرول کیا جائے اور ساتھ ہی طے شدہ ایس او پیز کے مطابق اشیاکی قیمتوں کی جانچ پڑتال کی جائے۔
ترجمان نے کہا ہے کہ وزیراعلیٰ سندھ نے آج خود سبزیوں اور پھلوں کی فہرست کا جائزہ لیا اور کہا کہ مارکیٹ میں سبزیوں اور پھل کے داموں کی فہرست چیک کروں گا۔
