کراچی : وزیراعلیٰ سندھ سید قائم علی شاہ سے کورکمانڈر کراچی جنرل نوید مختار کی ملاقات کر کے اویس شاہ اغوا کیس پر بات چیت کی گئی۔
تفصیلات کے مطابق وزیراعلی سندھ اور کورکمانڈر کے مابین سی اہم ہاؤس میں ملاقات ہوئی، جس میں چیف جسٹس آف سندھ کے بیٹے اویس شاہ کے اغوا اور بازیابی سے متعلق ہونے والے اقدامات پر تفصیلی گفتگو کی گئی۔
اس موقع پر انٹیلی جنس شیئرنگ پر تبادلہ خیال کیا گیا اور وزیر اعلی سندھ نے تمام سیکورٹی اداروں کے باہمی تعاون سے اویس شاہ کی جلد از جلد بازیابی کو یقینی بنانے کے حوالے سے اقدامات کا جائزہ بھی لیا۔
دوسری جانب تفتیشی حکام کے ذرائع نے کہا ہے کہ بیرسٹر اویس شاہ کی بازیابی کے لیے جیل میں قید دہشت گردوں کو بھی تحقیقات میں شامل کرنے کا فیصلہ کیا گیا ہے۔
تفتیشی ذرائع کے مطابق اس سلسلے میں کراچی سینٹرل جیل کی بیرک نمبر 05،17،18 اور20 میں قید کالعدم جماعتوں کے پانچ دہشت گردوں کو شامل تفتیش کیا جائے گا، حکام نے اس بات کی تصدیق کی ہے کہ آج تحقیقاتی ٹیم جیل کا دورہ کر کے قیدیوں سے پوچھ گچھ کرے گی۔
قبل ازیں آئی جی سندھ نے میڈیا سے گفتگو کرتے ہوئے کہا ہے کہ ’’ اویس شاہ لاپتہ نہیں بلکہ اغوا ہوئے ہیں اور دہشت گردوں نے اس کارروائی سے پورے سسٹم کے لیے چیلنج کیا ہے، مغوی کی بازیابی کے لیے ہرسطح پر اقدامات کئے جارہے ہیں اور جلد اس میں کامیابی حاصل ہوگی۔
