سندھ میں پی ٹی آئی کا کوئی مستقبل نہیں، مرادعلی شاہ -
The news is by your side.

Advertisement

سندھ میں پی ٹی آئی کا کوئی مستقبل نہیں، مرادعلی شاہ

جامشورو: وزیر اعلیٰ سندھ سید مراد علی شاہ نے کہا ہے کہ پی ٹی آئی کا سندھ میں کوئی مستقبل نہیں، پاناما لیکس کے فیصلہ سے سیاست پر گہرے اثرات مرتب ہونگے۔

ان خیالات کا اظہار انہوں نے سہون میں یوسی چیئرمین مخدوم ضمیر عباسی سے ان کی رہائشگاہ پر ملاقات کے بعد میڈیا کے نمائندوں سے بات کرتے ہوئے کیا۔

 وزیر اعلیٰ سندھ نے کہا کہ صوبے سے جلد بیروزگاری کاخاتمہ ہوگا اورنوجوانوں کو میرٹ کی بنیاد پر نوکریاں دی جائیں گی۔

 انہوں نے کہا کہ پی ٹی آئی کا سندھ میں کوئی مستقبل نہیں اورسندھ میں آئندہ حکومت بھی پیپلزپارٹی بنائے گی، انہوں نے کہا کہ سندھ میں پی ٹی آئی کبھی بھی اس پوزیشن میں نہیں آئیگی کہ اس سے انتخابات میں اتحاد کرنا پڑے۔

ایک سوال کے جواب میں انہوں نے کہا کہ ہرسیاسی جماعت انتخابی عمل کے لیے تیار رہتی ہے، انہوں نے کہا کہ پاناما لیکس کا جو بھی عدالتی فیصلہ آئے گا اس کے ملکی سیاست پر گہرے اثرات مرتب ہونگے۔

 انہوں نے کہا کہ کراچی میں حالیہ پولیس اہلکاروں کی شہادت پرافسوس ہے، انہوں نے کہا کہ ہم دہشتگردی کا خاتمہ چاہتے ہیں اور حکومت سندھ نے اس ضمن میں کئی اہم اقدامات کیے ہیں یہی وجہ ہے کہ سندھ میں ملک کے دیگر صوبوں کی نسبت امن امان کی صورتحال بہتر ہے۔

انہوں نے کہا کہ وفاقی حکومت سندھ کے فنڈزجاری نہیں کرتی جس کی وجہ سے سندھ کے کئی منصوبے پورے نہیں ہوسکے، انہوں نے کہا کہ عیدالفطرکے موقع پر صوبے بھر میں سیکیورٹی کے سخت اقدامات کیے گئے ہیں۔

ایک سوال کے جواب میں انہوں نے کہا کہ پی پی پی ایک جمہوری پارٹی ہے اور اختلاف رائے رکھناجمہوریت کا حسن ہے مگراس سے یہ تاثر لیناکہ پارٹی میں کوئی فارورڈ بلاک موجود ہے درست نہیں۔

Comments

comments

یہ بھی پڑھیں