کراچی: وزیراعلیٰ سندھ ایک بار پھر بیرون ملک روانہ ہوگئے ہیں، جہاں ان کی اہم شخصیات سے ملاقاتیں متوقع ہیں۔
ذرائع کے مطابق مراد علی شاہ ایک ہفتے کے نجی دورے پر امریکا روانہ ہوگئے ہیں، مراد علی شاہ آج امارات ایئرلائن کی پرواز ای کے607 سے روانہ ہوئے۔
ذرائع کا کہنا ہے کہ امریکا میں وزیراعلی ٰ سندھ کی اہم شخصیات سے ملاقاتیں متوقع ہیں، اطلاعات ہیں کہ بلاول بھٹو زرداری چند دن بعدوزیراعلی سندھ سےامریکا میں ملیں گے۔
واضح رہے کہ مراد علی شاہ کا امریکا کا یہ دوسرا نجی دورہ ہے، اس سے قبل جون کے وسط میں بھی وہ امریکا روانہ ہوئے تھے، صوبائی وزیر صحت ڈاکٹر عذرا پیجوہو بھی امریکا میں موجود ہیں ۔
یہ بھی پڑھیں: بلاول بھٹو زرداری امریکا اڑان بھرنے کو تیار، ذرائع
دوسری جانب پاکستان پیپلزپارٹی کے رہنما نبیل گبول نے اے آر وائی نیوز کے پروگرام اعتراض ہے میں میزبان عادل عباسی کے سوال کا جواب دیتے ہوئے کہا تھا کہ بلاول بھٹو کسی کی منت سماجت کرنے امریکا نہیں جارہے، بلاول کو امریکی سینیٹرز نے امریکا کے دورے کی دعوت دی، وہ پاکستان کا مقدمہ لڑنے کے لیے ہی جارہے ہیں۔
قبل ازیں وزیراعظم کے معاونِ خصوصی برائے سیاسی ابلاغ شہباز گل نے دعویٰ کیا کہ بلاول بھٹو ڈیل کرنے امریکا جارہے ہیں، وہ اپنی سی وی لے کر ’میں ہوں نا‘ کی شوٹنگ پر جارہے ہیں۔
معاونِ خصوصی کا کہنا تھا کہ ’بلاول نے ایک گھنٹے کام نہیں کیا اور وہ وزیراعظم بننے چلے ہیں، کیاامریکا کو یہ پیش کش کی جائے گی کہ ہمیں اقتدار میں لائیں، پھر اڈے مانگ لیں‘۔ انہوں نے کہا کہ ’پی ٹی آئی ایسی ڈیل کو کامیاب نہیں ہونےدے گی‘۔
