کراچی : وزیراعلیٰ سندھ مرادعلی شاہ نے کہا ہے کہ تحریک انصاف کے جن وزراء کو حکومتی ایوارڈ سے نہیں نوازا گیا انہوں نے سندھ کا رخ کرلیا۔
پنجاب کے شہر صادق آباد میں جاری پیپلزپارٹی کے عوامی لانگ مارچ کے موقع پر میڈیا سے گفتگو کرتے ہوئے مراد علی شاہ نے کہا کہ وفاقی وزراء ایوارڈ کے چکر میں سندھ میں اترے ہوئے ہیں۔
پی ٹی آئی کے سندھ حقوق مارچ میں عوام کی شمولیت پر ان کا کہنا تھا کہ پی ٹی آئی وزراء عوام کے بجائے ایک دوسرے سے خطاب کررہے ہیں۔
انہوں نے کہا کہ پنجاب میں رکاوٹوں سے ہمارا مارچ رک نہیں سکتا، پی پی کے لانگ مارچ کا سمندر ہر صورت اسلام آباد پہنچے گا۔
سید مراد علی شاہ نے بتایا کہ رحیم یار خان پولیس نے رکاوٹیں کھڑی کیں، وزیراعلیٰ پنجاب سے بات ہوئی، وزیر اعلیٰ پنجاب کا شکریہ کہ انہوں نے فوری ایکشن لیا۔
سانگھڑ میں پی ٹی آئی ریلی میں گڑبڑ کی اطلاع آئی میں نے فوری ایکشن لیا، عدم اعتماد کی تحریک سے حکومت کا خاتمہ کردیں گے۔ پنجاب کے عوام بلاول بھٹو کے مارچ کا والہانہ استقبال کررہے ہیں، یہ مارچ کسی رکاوٹوں سے رکنے والا نہیں، حکومت کو ہٹا کر دم لیں گے۔
