لاڑکانہ : وزیر اعلیٰ سندھ سید مراد علی شاہ نے کہا ہے کہ پیپلزپارٹی آئندہ انتخابات میں بھرپور کامیابی حاصل کرے گی، نون لیگ پہلے فیصلہ کرے کہ اسے کون لیڈ کرے گا؟ عمران خان کو صرف جلسوں سے ووٹ نہیں ملیں گے، مصطفیٰ کمال کی باتوں کی کوئی اہمیت نہیں، ۔
ان خیالات کا اظہار انہوں نے گڑھی خدا بخش لاڑکانہ میں بھٹو مزار کمیٹی کے اجلاس میں شرکت کے بعد میڈیا سے گفتگو کرتے ہوئے کیا۔
تفصیلات کے مطابق وزیراعلیٰ سندھ کی زیرصدارت اجلاس میں بینظیر بھٹو کی برسی کے انتظامات کو حتمی شکل دی گئی، اس موقع پر اسپیکرسندھ اسمبلی آغا سراج درانی اور قائم علی شاہ کے علاوہ صوبائی وزراء، ڈی آئی جی لاڑکانہ اور پی پی کے ارکان اسمبلی بھی موجود تھے۔
چیئرمین پی ٹی آئی عمران خان کو تنقید کا نشانہ بناتے ہوئے ان کا کہنا تھا کہ الیکشن سے چند ماہ قبل جلسے کرنے سے ووٹ نہیں ملتے اس کے لیے عوام کی خدمت کرنا پڑتی ہے، عوام کی خدمت کا خیال انہیں2013 میں آنا چاہیے تھا۔
سید مراد علی شاہ نے کہا کہ مصطفیٰ کمال کی باتوں کو کوئی اہمیت نہیں دیتا اور نہ ہی میرے نزدیک اس کی کوئی اہمیت ہے، اس کے بیانات سے کوئی فرق نہیں پڑتا۔
پیپلز پارٹی کے خلاف اتحاد بنتے رہتے ہیں، چند دن کی بات ہے مصطفیٰ کمال پھر واپس چلاجائے گا، مراد علی شاہ کا مزید کہنا تھا کہ کراچی میں ہونے والے احتجاج میں اساتذہ کو کچھ سیاسی تنظیموں نے اشتعال دلانے کی کوشش کی تھی، پرامن احتجاج کرناہرکسی کاحق ہے، پیپلزپارٹی آئندہ انتخابات میں کامیابی حاصل کرے گی۔
مراد علی شاہ کا مزید کہنا تھا کہ جلسہ دن ایک بجے شروع ہو گا، بلاول بھٹو اور آصف زرداری جلسے سے خطاب کریں گے، انہوں نے انتظامیہ کو ہدایت کی کہ ٹریفک اور پارکنگ کے نظام کو بہتر بنایا جائے۔
