The news is by your side.

Advertisement

انٹرنیشنل فلائٹس بند کی جائیں، وزیراعلیٰ سندھ کی وفاق سے گزارش

کراچی : وزیراعلیٰ سندھ مراد علی شاہ نے کہا وفاق سےگزارش کروں گا کہ انٹرنیشنل فلائٹس بند کریں ، ہم لوگوں کو مرتے دیکھ نہیں سکتے۔

تفصیلات کے مطابق وزیراعلیٰ سندھ مراد علی شاہ نے کورونا ٹاسک فورس کے اجلاس کے بعد پریس کانفرنس کرتے ہوئے کہا جب سے کورونا کا پہلا کیس آیا آج 425 دن ہوگئے ہیں، ابتک 35 لاکھ 66 ہزار سے زائد کورونا ٹیسٹ کرچکے ہیں، کل سندھ میں کورونا کے 952 مثبت کیسز سامنے آئے اور مزید 6 لوگ کورونا سے انتقال کرگئے، جس کے بعد سندھ میں تقریباً 4600 کورونا سے اموات ہوچکی ہیں۔

وزیراعلیٰ سندھ کا کہنا تھا کہ ہمارے آئیسولیشن تقریباً ختم ہیں، پاکستان میں کل سندھ سے 5.62 فیصد مثبت کیسز سامنے آئے، دیکھا جائے تو پاکستان میں پوزیٹو کیسز میں سندھ سب سے کم ہے، پنجاب 11.26، کے پی 12.40، اسلام آباد میں 12.60 فیصد شرح ہے، یہ نمبرز دیکھ کر لگتا ہے کہ ابھی بھی سندھ کی شرح باقی صوبوں سے آدھی ہے۔

کورونا صورتحال کے حوالے سے مراد علی شاہ نے کہا کہ ہمیں کوروناکےحوالےسےسب سےزیادہ تشویش ہے، این سی سی سے کہا کہ انٹر بس سروس بندکریں جونہیں کیاگیا، سندھ نے وبا کو قابو کرنے میں بہترسےبہتراقدامات کئے، ہم نےاسپتالوں میں کیپسٹی کوبڑھایا، ہمارے ریکورہونےوالےمریضوں کی تعداد94فیصدہے جبکہ پورے پاکستان کی ایوریج ریکور ہونے کی 86 فیصد ہے۔

اموات کی شرح سے متعلق ان کا کہنا تھا کہ سندھ کی شرح اموات 1.6 فیصد ، پنجاب اور کے پی 2.75 فیصد، بلوچستان کی 1.07 فیصد ہے، ہمارے پاس سہولتیں زیادہ ہیں باوجوداس کےہم گھبرائےہوئےہیں، گزشتہ 7 دن میں سندھ کے مثبت کیسز اور شرح اموات بڑھی ہے، این سی سی کے مطابق صوبے اضافی اقدامات کا اختیار رکھتے ہیں۔

وزیراعلیٰ سندھ نے مثبت کیسز کے حوالے سے بتایا کہ ایک ہفتے میں کراچی ایسٹ میں مثبت کیسز کی شرح 21فیصد ، کراچی ساؤتھ 12 فیصد ، کراچی سینٹرل میں9فیصد اور حیدرآباد میں 16فیصد ہے ۔

اسپتالوں کی صورتحال سے متعلق مراد علی شاہ کا کہنا تھا کہ سندھ میں کورونا مریضوں کیلئے مختص آکسیجن بیڈز 664 موجود ہیں جبکہ 1872 ایچ ڈی یو بیڈز میں سے 296 میں آکسیجن کی سہولت ہے، آج کی تاریخ میں 47لوگ وینٹی لیٹرپرہیں جبکہ 453 ہمارے پاس آئی سی یوبیڈز بھی موجودہیں۔

انھوں نے مزید کہا کہ اگر پورے ملک کو دیکھا ہمارے صورتحال بہترہے، مردان میں31 فیصد کورونا پوزیٹو ہیں، پشاور میں کورونا مثبت کیسز کی شرح 24 فیصد کے قریب ہے، صوابی میں کورونا پوزیٹو 20 فیصد ہے۔

کورونا ویکسین سے متعلق وزیراعلیٰ سندھ کا کہنا تھا کہ وفاق سے سندھ کو5لاکھ 62ہزارسائنو فارمز کے ڈوزز ملے، جس میں سے کوکین سائنو کے 11 ہزار ڈوز اور 80 ہزار سائنوویک کے ڈوزز ملے ہیں، ہم5لاکھ41ہزار809 ڈوز اپنے ڈسٹرکٹس کو ایشو کرچکےہیں اور کین سینو کے 11ہزارڈوززمیں سے10ہزار 902 لگ چکی ہیں۔

مراد علی شاہ نے بتایا کہ وفاق نےکہاہےآج 1لاکھ 70ہزار سائنو فارم کی ڈوزز سندھ کوملیں گی، چائنیز وفاقی حکومت کیساتھ ڈیل کرنے کی کوشش کرتے ہیں، ہم نے بڑی کوشش کی کہ ویکسین خودمنگائی جائے۔

آکسیجن سپلائی کے حوالے سے ان کا کہنا تھا کہ سندھ حکومت کے 3اسپتالوں میں آکسیجن جنریشن پلانٹ موجود ہیں، ٹراماسینٹر، گمبٹ اور اوجھا میں آکسیجن جنریٹ کرتے ہیں۔

کورونا ٹاسک فورس کے اجلاس میں ہونے والے فیصلوں سے متعلق وزیراعلیٰ سندھ نے بتایا کہ سرکاری دفاترمیں 20فیصد سےزائد عملہ نہ بلایا جائے ، سرکاری دفاترکےاوقات صبح9 بجے سے 2 بجے تک کردیئےگئے ، ملازمین کی چھٹی نہیں ہے دفتری اوقات میں فون پر ساتھ رہناہے، ملازمین کو کام دےدیاجائےگا وہ گھروں سے کام کریں گے۔

مراد علی شاہ کا کہنا تھا کہ سندھ میں اسکولز،کالجز،یونیورسٹیز مکمل طورپر بند کررہےہیں ، ریسٹورنٹس میں آؤٹ ڈور ڈائننگ پابندی کے باوجود جاری تھی تاہم اب ریسٹورنٹس میں ٹیک اوے اور ہوم ڈیلیوری کھلی رہےگی اور ریسٹورنٹس میں آؤٹ ڈورڈائننگ پرپابندی رہے گی۔

انھوں نے مزید کہا کہ پرائیوٹ دفاتر میں 50فیصد اسٹاف پر عملدرآمد نہیں کیاجارہا، پرائیوٹ دفاتر میں 50فیصد سےزائداسٹاف پر دفتر سیل کر دیا جائے گا جبکہ ہر دکان میں 50 فیصد سے زائد کسٹمرز کی اجازت نہیں ہے، کسی بھی دکان میں شہریوں کو بغیرماسک داخلے کی اجازت نہیں۔

وزیراعلیٰ سندھ کا کہنا تھا کہ دکان مالک دکان کے حساب سے گاہک کواندرداخل ہونےدے،اگرکہیں کوئی خلاف ورزی کرے گا تو مجبوراً دکان سیل کرنا پڑے گی، جوایس اوپیزفالوکرےگااسےاجازت ہےوہ اپناکاروبارکرے۔

مراد علی شاہ نے سب کو تلقین کی کہ عیدپرخاص طورپرایس اوپیزکاخیال رکھیں، گزشتہ سال بھی لوگوں سےگزارش کی تھی عیدپرجہاں ہیں وہی رہیں، اس سال بھی سب سےگزارش کرونگاکہ اس عیدپرسب جوجہاں ہیں وہی پرہی رہیں۔

انھوں نے مزید کہا کہ کراچی ایئررپورٹ پر سندھ حکومت نے اپنی ڈیسک قائم کررکھی ہے، وفاق سےدرخواست کروں گا وہ بھی انٹرسٹی ٹرانسپورٹ بند کرے ، پوری دنیانےاپنےبارڈرزکنٹرول کیےہیں، ہمارے ملک کی انٹری کئی ممالک میں بندہوگئی ہے، وفاق سےگزارش کروں گا کہ انٹرنیشنل فلائٹس بند کریں ، ہم لوگوں کو مرتے دیکھ نہیں سکتے، بہت دن انتظارکیاکہ کوئی قدم اٹھائے جائیں، جب سے کورونا آیا اپریل کامہینہ دنیا کیلئے براثابت ہوا۔

وزیراعلیٰ سندھ کا کہنا تھا کہ این سی سی میں تجویزآئی تھی سول ایڈمنسٹریریشن کیساتھ فوج بلائی جائے، آج میں نے میٹنگ کی جس میں کابینہ کےوزراشامل تھے، ہم نےآج فیصلہ کیا ہےکہ فوج کےحوالےسےریکوزیشن بھیج دیں، فوج ہمارے ساتھ پہلے ہی کام کررہی ہے، سول انتظامیہ کیساتھ جہاں ضرورت ہوئی فوج کام کرے گی۔

این اے249 الیکشن سے متعلق مراد علی شاہ نے مزید کہا کہ کوروناکی تیسری لہربہت خطرناک ہے ، ہم چاہتےہیں کہ این اے249 کا الیکشن ملتوی ہوں ، ایسی صورتحال نہیں کہ کوئی بڑاایونٹ ہوسکے۔

Comments

یہ بھی پڑھیں