The news is by your side.

Advertisement

بچوں کے قتل کا واقعہ، وزیراعلیٰ پنجاب پولیس افسران پر برہم، قاتلوں کی فوری گرفتاری کا حکم

لاہور: وزیراعلیٰ پنجاب عثمان بزدار نے پنجاب کے ضلع چونیاں میں بچوں کے قتل کے واقعے پر شدید برہمی کا اظہار کرتے ہوئے پولیس افسران کو حکم دیا ہے کہ ملزمان کی فوری گرفتاری عمل میں لائی جائے، زبانی جمع خرچ نہیں چلے گا۔

تفصیلات کے مطابق وزیراعلیٰ پنجاب عثمان بزدار کی زیرصدارت رات گئے لاہور ائیرپورٹ پر اعلیٰ سطح اجلاس ہوا، اجلاس میں وزیراعلیٰ کو چونیاں واقعے سے متعلق رپورٹ پیش کی گئی۔

اس موقع پر آئی جی پنجاب نے تحقیقات میں اب تک کی پیش رفت سے آگاہ کیا، وزیراعلیٰ پنجاب بچوں کے بہیمانہ قتل کا واقعہ رونما ہونے پر سخت برہم ہوگئے اور بچوں کے قتل میں ملوث ملزمان کو جلد سے جلد گرفتار کرنے کا حکم دیا۔

عثمان بزدار کا کہنا تھا کہ مجھے ملزمان کی گرفتاری چاہیے، زبانی جمع خرچ نہیں چلے گا، باربار ایسے واقعات پولیس کی نااہلی، غفلت کا نتیجہ ہیں، پولیس نے بچوں کی گمشدگی کے باوجود فوری اقدامات نہیں کئے، جدید انداز سے تفتیش ہوتی تو ایسے اندوہناک واقعے سے بچا جاسکتا تھا۔

چونیاں میں ایک اور لڑکے کے اغوا کی کوشش، لڑکا بھاگنے میں کامیاب

وزیراعلیٰ نے کہا کہ غفلت اور کوتاہی کے ذمہ داروں کا کڑا احتساب ہوگا، جو کام نہیں کرے گا وہ گھر جائے گا، میں کسی نااہل افسر یا اہلکار کو برداشت نہیں کروں گا، اب کسی سے کوئی رعایت نہیں ہوگی، صرف معطلیاں کافی نہیں، غفلت اور کوتاہی پر برطرف کیا جائے۔

ان کا کہنا تھا کہ پولیس کو ٹھیک کرنے کیلئے ہنگامی بنیادوں پر کام کی ضرورت ہے، متاثرین کو انصاف کی فراہمی ہر صورت یقینی بنائی جائے گی، میرا فرض اور ذمہ داری ہے کہ متاثرین کوفوری انصاف ملے۔

انہوں نے مزید کہا کہ کیس پر ہونے والی پیش رفت کی ذاتی طور پر نگرانی کروں گا۔ اس موقع پر وزیراعلیٰ عثمان بزدار نے چونیاں میں اضافی نفری تعینات کرنے کا حکم بھی دے دیا۔

Comments

comments

یہ بھی پڑھیں