لاہور : وزیراعلیٰ پنجاب سردارعثمان بزدار نے کہا ہے کہ بلوچستان کے عوام کی ترقی و خوشحالی بھی پنجاب کے عوام کی طرح عزیز ہے، بلوچستان کی ترقی پاکستان کی ترقی ہے۔
ان خیالات کا اظہار انہوں نے وزیراعلیٰ بلوچستان جام کمال خان سے ملاقات کے موقع پر گفتگو کرتے ہوئے کیا۔ تفصیلات کے مطابق وزیراعلیٰ پنجاب سردارعثمان بزدار سے وزیراعلیٰ آفس میں وزیراعلیٰ بلوچستان جام کمال خان نے ملاقات کی۔
ملاقات میں باہمی دلچسپی کے امور اور مختلف شعبوں میں دونوں صوبوں میں تعاون بڑھانے پر تبادلہ خیال کیا گیا۔
عثمان بزدار نے کہا کہ مجھے بلوچستان کے عوام کی ترقی و خوشحالی اسی طرح عزیز ہے جس طرح پنجاب کے عوام کی۔
انفارمیشن ٹیکنالوجی، ہارٹیکلچر، سیاحت، تعلیم اور صحت کے شعبوں میں اپنے بلوچ بہن بھائیوں کو ہر ممکن تعاون فراہم کریں گے۔
انہوں نے کہا کہ بلوچستان کی ترقی پاکستان کی ترقی ہے ، پنجاب کے تعلیمی اداروں میں بلوچ طلباء و طالبات کیلئے خصوصی کوٹہ مختص کیا گیا ہے جبکہ پنجاب حکومت بلوچستان میں دل کا ہسپتال قائم کرے گی اور اس ضمن میں دو ارب روپے مختص کر دیئے گئے ہیں۔
اس موقع پر بلوچستان کے وزیراعلیٰ جام کمال خان نے سردار عثمان بزدار کو بلوچستان کے دورے کی دعوت دیتے ہوئے کہا کہ پنجاب میں آکر بہت پیار ملا ہے، ترقی کے سفر میں ہم مل کر آگے بڑھیں گے۔
بدقسمتی سے ماضی کی حکومتوں نے سیاحت جیسے اہم شعبے کو نظر انداز کیا، مقامی سیاحت کو فروغ دے کر معیشت کو مضبوط بنایا جا سکتا ہے۔ انہوں نے کہا کہ میر چاکر اعظم رند کے مقبرے کی بحالی کے کام پر وزیراعلیٰ پنجاب سردار عثمان بزدار کے شکر گزار ہیں۔
