لاہور: وزیراعلیٰ پنجاب سردارعثمان بزدار کا کہنا ہے کہ بلدیاتی نظام کونچلی سطح پرمنتقل کرنے کے لیے کام مکمل کر لیا گیا ہے۔
تفصیلات کے مطابق لاہور میں وزیراعلیٰ پنجاب کی زیرصدارت 100 روزہ ایجنڈے سے متعلق اجلاس ہوا جس میں وزیراعظم کے 100 روزہ ایجنڈے سے 15 نکات پر تفصیلی بریفنگ دی گئی۔
وزیراعلیٰ پنجاب کے مشیر ارباب شہزاد نے پنجاب میں 100 روزہ ایجنڈے پر ہونے والی پیش رفت پر اطمینان کا اظہارکیا۔ انہوں نے کہا کہ خوشی ہے 100 روزہ ایجنڈے کوتیزی سے آگے بڑھایا جا رہا ہے۔
اس موقع پرسردار عثمان بزدار نے کہا کہ وزیراعظم عمران خان کا 100روزہ ایجنڈا ترقی اور خوشحالی کا مربوط پروگرام ہے۔
وزیراعلیٰ پنجاب نے کہا کہ بلدیاتی نظام کونچلی سطح پر منتقل کرنے کے لیے کام مکمل کر لیا گیا ہے، نئے بلدیاتی نظام میں عوام با اختیار ہوں گے۔
سردارعثمان بزدار نے کہا کہ پولیس نظام میں اصلاحات کا ایجنڈا مکمل کریں گے، پولیس کوعوام کا خادم بنائیں گے۔
انہوں نے کہا کہ ہیلتھ کارڈ کا دائرہ کار پنجاب کے ہر ضلع تک بڑھایا جائے گا، پینے کے صاف پانی کیے لیے مربوط پلان مرتب کررہے ہیں۔
تحریک انصا ف کی حکومت نےآتے ہی طاقتورمافیا پر ہاتھ ڈالا‘عثمان بزدار
یاد رہے کہ گزشتہ ہفتے وزیراعلیٰ پنجاب سردار عثمان بزدار کا کہنا تھا کہ اب تک اربوں کی ہزاروں کنال اراضی کو واگزارکرایا جا چکا ہے۔
