site
stats
سندھ

بلاول پر تنقید کے بجائے نثار اپنا کام کریں، مراد علی شاہ

کراچی: وزیراعلیٰ سندھ سید مراد علی شاہ نے کہا ہے کہ بلاول پر تنقید کرنے کے بجائے چوہدری نثار اپنے کام پرتوجہ دیں تو زیادہ بہتر ہے، گورنر کی تبدیلی سے متعلق وفاقی حکومت آگاہ کردیتی تو بہتر ہوتا۔

یہ بات انہوں نے سینٹ پیٹرک اسکول میں جاری کھیلوں کے مقابلے کے اختتام پر منعقدہ تقریب سے خطاب کرتے ہوئے کہی۔ ان کے ہمراہ وزیر کھیل محمد بخش خان مہر بھی موجود تھے۔

 

وزیراعلیٰ سندھ نے کہا کہ میں نے بھی سینٹ پیٹرک اسکول میں تعلیم حاصل کی ہے اس لیے یہاں آکر بہت خوشی محسوس کررہا ہوں مجھے میرا بچپن یاد آگیا۔

انہوں نے مقابلے میں حصہ لینے والے کامیاب طالب علموں میں انعامات تقسیم کیے اور اپنے خطاب میں کامیاب طالب علموں کو مبارک باد دیتے ہوئے کہا کہ تعلیم کے ساتھ ساتھ کھیلوں کے مقابلے بھی منعقد ہونے چاہیے جس پر اسکول انتظامیہ تعریف کی مستحق ہے۔

اس موقع پر انہوں نے کہا کہ میری پہلی ترجیح تعلیم ہے میرا وعدہ ہے کہ تعلیم میدان میں سندھ بہت ترقی کرے گا اس لیے اس شعبے میں ایمرجنسی نافذ کر رکھی ہے۔

انہوں نے تعلیم کے شعبے میں سندھ حکومت کی جانب سے اُٹھائے جانے والے اقدامات کی تفصیل بتا تے ہوئے کہا کہ تعلیم بالغاں کے لیے ہم نے باقاعدہ طور پر ایک پروگرام ترتیب دیا ہے جب کہ جہاں فنڈ کی ضرورت رہی ہم نے فوری فنڈ مہیا کیے تا کہ کسی بھی تعلیمی پروجیکٹ کی تکمیل میں دیر نہ ہو۔

بعد ازاں انہوں نے صحافیوں سے گفتگو کرتے ہوئے کہا کہ تعلیم اور کھیل کے شعبے میں انقلابی اقدامات کر رہے ہیں عوام کو سستی اور معیاری تعلیم اور کھیل کی سہولیات فراہم کرنے کے لیے ترجیحی بنیادوں پر کام کر رہے ہیں لوگ جلد آپ ان شعبوں میں نمایاں فرق دیکھیں گے۔

کراچی میں بلدیاتی سہولتوں کے فقدان اور عالمی سطح پر کراچی کی ریٹنگ کے حوالے سے پوچھے گئے سوال کے جواب میں انہوں نے کہا کہ کراچی کی صورتِ حال تشویشناک ہیں لیکن ہم تندہی سے کام کر رہے ہیں ماضی کے بجائے مستقبل پر نگاہ ہے۔

چوہدری نثار کی بلاول پر تنقید کے حوالے سے پوچھے گئے سوال کے جواب میں وزیراعلیٰ سندھ نے کہا کہ وفاقی وزیر داخلہ کسی پر تنقید کرنے کے بجائے اپنا کام کریں تو زیادہ بہتر ہو گا۔

نئے گورنر سندھ کی تعیناتی پر انہوں نے کہا کہ وفاقی حکومت صوبائی حکومت کو اعتماد میں لے لیتی تو بہتر ہوتا ہمیں بھی میڈیا سے پتا سے چلا کہ گورنر تبدیل کیے جا رہے ہیں اور جسٹس سعید الزماں صدیقی نئے گورنر ہوں گے، ویسے نئے گورنر سندھ کافی تجربہ کارانسان ہیں۔

دریں اثنا وزیراعلیٰ سندھ کی سینٹ پیٹرک اسکول آمد کے سببب صدر میں بدترین ٹریفک جام ہوگیا، گاڑیاں اور موٹر سائیکلیں راستے کی تلاش میں گلیوں میں جانکلیں اور وہاں سے بھی نکلنے کاراستہ نہیں ملا۔ شہری گھنٹوں صدر میں پھنسے رہے۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top