راولپنڈی: پی او ایف واہ کے دورے کے موقع پر آرمی چیف جنرل عاصم منیر کا کہنا ہے کہ پاکستان کے دفاع کو مضبوط اور یقینی بنائیں گے۔
فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے پی او ایف واہ کا دورہ کیا جہاں انہیں پیداواری صلاحیتوں اور افواج کی دفاعی ضروریات پوری کرنے میں ادارے کے تعاون پر بریفنگ دی گئی جبکہ دفاعی مصنوعات کی برآمدات سے بھی آگاہ کیا گیا۔
آئی ایس پی آر کے مطابق آرمی چیف نے پی او ایف مصنوعات کے تجربے کی رینجز کا بھی دورہ کیا اور مختلف ہتھیاروں کے ٹیسٹ ٹرائلز کا مشاہدہ کیا۔
متعلقہ: مسلح افواج جدید ویپن سسٹم کو اپنا رہی ہے، آرمی چیف عاصم منیر
سپہ سالار نے بنیادی دفاعی صنعت کے طور پر پی او ایف کے کردار کو سراہا۔ انہوں نے افسروں اور اہلکاروں سے خطاب کرتے ہوئے کہا کہ مقامی صنعتوں کے فروغ اور خود انحصاری سے قومی ترقی کا راستہ متعین ہوتا ہے۔
انہوں نے کہا کہ خود انحصاری اور جدید ٹیکنالوجی کے فروغ کیلیے اقدامات کرتے رہیں گے۔ آئی ایس پی آر کے مطابق فیکٹریز آمد پر چیئرمین پی او ایف نے آرمی چیف کا استقبال کیا۔
