اسلام آباد : آرمی چیف جنرل سید عاصم منیر کا کہنا ہے کہ پاکستان ایک ایسا خطہ چاہتا ہے جہاں امن، تجارت ٹرانزٹ اور سرمایہ کاری ہو۔
تفصیلات کے مطابق اقوام متحدہ کے امن مشن کے وزارتی اجلاس کے حوالے سے تیاریوں کا جائزہ لینے کیلئے اجلاس ہوا، آرمی چیف جنرل سید عاصم منیر کی اختتامی سیشن میں بحیثیت مہمان خصوصی شرکت کی۔
اجلاس میں مختلف ممالک کے مندوبین، یواین کے اعلیٰ حکام،سفارتی برادری کے ارکان نے بھی شرکت کی، امن مشن کے تحفظ، سیکیورٹی کے موضوع پر اجلاس کی مشترکہ میزبانی پاکستان اور جاپان نے کی۔
آرمی چیف جنرل سید عاصم منیر نے امن دستوں کو درپیش بڑھتے ہوئے چیلنجز، خطرات کواجاگر کرتے ہوئے کہا کہ عالمی امن کی بحالی میں اقوام متحدہ کا کردار لائق تحسین ہے۔
جنرل سید عاصم منیر کا کہنا تھا کہ امن مشن پر مامور جوانوں کے تحفظ، سیکیورٹی کو یقینی بنانے کیلئے موثر اقدامات کرنا ہوں گے۔
انھوں نے کہا کہ پاکستان ایک ایسا خطہ چاہتا ہے جہاں امن، تجارت ٹرانزٹ اور سرمایہ کاری ہو، ایسا خطہ جو جنوبی، مغربی اور وسطی ایشیا کی تمام ریاستوں کیلئے خوشحالی کا باعث بنے۔
مسئلہ کشمیر کے حوالے سے آرمی چیف کا کہنا تھا کہ مسئلہ کشمیر سلامتی کونسل کی قراردادوں اور کشمیریوں کی امنگوں کے مطابق حل کیا جائے۔
انڈرسیکریٹری پیس آپریشنز نے کانفرنس کی میزبانی اور عالمی امن کیلئے کردار پر پاکستان کا شکریہ ادا کیا۔