راولپنڈی: آرمی چیف جنرل قمر جاوید باجوہ کا کہنا ہے کہ پاکستان متحدہ عرب امارات سے باہمی تعلقات کو مزید وسعت دینے کا خواہاں ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے امارات کے پاکستان میں تعینات سفیر نے ملاقات کی۔ اس دوران دفاعی، سکیورٹی تعاون اور باہمی دلچسپی کے امور زیرِ بحث آئے۔
ملاقات میں علاقائی سکیورٹی صورتِ حال پر بھی تبادلہ خیال ہوا۔ آرمی چیف اور سفیر میں اسٹریٹجک شراکت داری کو مزید فروغ دینے پر اتفاق ہوا۔
جنرل قمر جاوید باجوہ نے سیلاب متاثرین کے لیے یو اے ای کی جانب سے امداد کو سراہا جبکہ یو اے ای سفیر نے خطے میں امن و استحکام کے لیے پاکستان کی کوششوں کی تعریف کی۔
ملاقات میں آرمی چیف نے کہا کہ پاکستان عالمی اور علاقائی امور میں یو اے ای کے کردار کو اہمیت دیتا ہے، یو اے ای سے باہمی تعلقات کو مزید وسعت دینے کے خواہاں ہیں۔
