سانحہ پارا چنار کے ذمہ داران کو قانون کے کٹہرے میں لایا جائے گا: آرمی چیف -
The news is by your side.

Advertisement

سانحہ پارا چنار کے ذمہ داران کو قانون کے کٹہرے میں لایا جائے گا: آرمی چیف

راولپنڈی: آرمی چیف جنرل قمر جاوید باجوہ نے مختلف فرقوں کے علمائے کرام سے ملاقاتیں کرتے ہوئے انہیں یقین دہانی کروائی کہ سانحہ پارا چنار کے ذمہ داروں کو قانون کے کٹہرے میں لایا جائے گا۔

پاک فوج کے شعبہ تعلقات عامہ آئی ایس پی آر کے سربراہ میجر جنرل آصف غفور کی جانب سے جارہ کردہ بیان کے مطابق آرمی چیف جنرل قمر جاوید باجوہ نے مختلف فرقوں کے علمائے کرام سے ملاقاتیں کیں۔

ڈی جی آئی ایس پی آر کے مطابق آرمی چیف کا کہنا ہے کہ سانحہ پارا چنار کے ذمہ داروں کو قانون کے کٹہرے میں لایا جائے گا۔ سانحہ پارا چنار کے متاثرین کی بلا تفریق مدد کی جائے گی۔

آرمی چیف کا کہنا تھا کہ ہر شہید اور زخمی ہمارے لیے برابر ہے۔ ہم سب پاکستانی اور مسلمان ہیں جو ملک میں بسنے والی تمام اقلیتوں کے مذہبی حقوق کا احترام کرتے ہیں۔ دشمن اب ہمیں تقسیم کرنے میں ناکامی کے بعد فرقہ واریت کے ذریعے وار کر رہا ہے۔

ان کا مزید کہنا تھا کہ دشمن سوشل میڈیا کے ذریعے بدنیتی پر مبنی مہم چلا رہا ہے جو قابل مذمت ہے اور ہم سب کو اس کا ادراک ہونا چاہیئے۔

آرمی چیف نے کہا کہ فاٹاسمیت ملک بھر میں سیکیورٹی صورتحال بہتر ہوئی ہے اور اسے کسی بھی قیمت پر دوبارہ بگڑنے نہیں دیا جائے گا۔

یاد رہے کہ 23 جون کو پارا چنار کی اکبر مارکیٹ میں 2 خود کش دھماکے ہوئے تھے جس کے نتیجے میں 50 افراد شہید ہوگئے۔


Comments

comments

یہ بھی پڑھیں