راولپنڈی: چیف آف آرمی اسٹاف جنرل قمر جاوید باجوہ نے کرونا وبا میں پاکستان کے ساتھ تعاون کرنے پر چین کا شکریہ ادا کیا ہے۔
چین کے سفیر اور قطر کے نمائندہ خصوصی نے چیف آف آرمی اسٹاف جنرل قمر جاوید باجوہ سے ملاقات کی، جس میں دونوں ممالک سے باہمی روابط بڑھانے پر اتفاق کیا گیا۔
پاک فوج کے شعبۂ تعلقاتِ عامہ (آئی ایس پی آر) کی جانب سے جاری اعلامیے کے مطابق چینی سفیر نے جنرل ہیڈ کوارٹرز راولپنڈی کا دورہ کیا، جہاں آرمی چیف جنرل قمرجاویدباجوہ نے اُن سے ملاقات کی۔
ملاقات میں باہمی دلچسپی، علاقائی سیکیورٹی اور مختلف شعبوں میں تعاون پرتبادلہ خیال کیا گیا جبکہ پاک چین اقتصادی راہداری کے امور بھی زیر غور آئے۔
چیف آف آرمی اسٹاف جنرل قمر جاوید باجوہ نے کرونا وبا میں پاکستان کی مدد کرنے پر چین کا شکریہ ادا کیا۔ چینی سفیر نے خطے میں امن کی کاوشوں کے لیے پاکستان کے مثبت کردارکو سراہا، چینی سفیر نے باہمی سفارتی تعاون مزید بہتربنانےکےعزم کا اعادہ بھی کیا۔
علاوہ ازیں قطر کے نمائندہ خصوصی ڈاکٹر مطلق بن مجید نے جی ایچ کیو کا دورہ کیا، جہاں چیف آف آرمی اسٹاف نے مہمان سے ملاقات کی۔
آئی ایس پی آر کے مطابق ملاقات میں باہمی دلچسپی، علاقائی سیکیورٹی اور افغان مفاہمتی عمل پر تبادلہ خیال کیا۔
ترجمان پاک فوج کے مطابق ملاقات میں مختلف شعبوں میں باہمی تعاون کے فروغ پر بھی بات چیت ہوئی، آرمی چیف نے افغان امن عمل میں قطر کے سرگرم اور تعمیری کردار کو سراہا۔
چیف آف آرمی اسٹاف جنرل قمر جاوید باجوہ نے کہا کہ ’توقع ہے علاقائی امن و استحکام کے لیے قطر کا تعاون جاری رہےگا‘۔ قطری نمائندے نے امن و استحکام کیلئے پاکستان کی کوششوں کی تعریف کی اور باہمی تعاون کو مزید فروغ دینےکےعزم کا اعادہ بھی کیا۔
