کراچی: آرمی چیف جنرل راحیل شریف نے کہا ہے کہ کراچی میں ٹارگٹ آپریشن سے امن و امان کی صورتحال بہتر ہوئی، کراچی سے دہشت گردی کے خاتمہ تک آپریشن جاری رہےگا۔
کور ہیڈ کوارٹرز میں امن و امان سے متعلق اہم اجلاس منعقد ہوا جس میں آرمی چیف جنرل راحیل شریف،وزیر داخلہ چوہدری نثار ، گورنر سندھ ڈاکٹر عشرت العباد، وزیراعلیٰ سندھ قائم علی شاہ، صوبائی مشیر داخلہ سہیل انور سیال، ڈی جی رینجرز سندھ میجر جنرل بلال اکبر،کور کمانڈر کراچی اور دیگر سیکیورٹی اداروں کے اہم افسران نے شرکت کی۔
اجلاس میں آرمی چیف کو ٹارگٹڈ آپریشن پر بریفنگ دی گئی اور اویس شاہ کے اغوا سمیت امجد صابری کے قتل کے معاملے میں اب تک کی گئی تحقیقات سے آگاہ کیا گیا۔
جنرل راحیل شریف نے کہا کہ سیکیورٹی اداروں کی صلاحیت بڑھانے کے لیے موثر اقدامات کریں گے ۔ انہوں نے قانون نافذ کرنے والے اداروں کو ہدایات دیں کہ تمام سیکیورٹی ادارے مل کر کام کریں اور دہشت گردی کے خاتمے کے لیے پیشگی کارروائیاں کی جائیں، قوم دہشت گردی کے خاتمے کے لیے متحدہ ہے۔
قبل ازیں آرمی چیف جنرل راحیل شریف نے رینجرز ہیڈ کوارٹرز کراچی میں امن وامان کی صورتحال پر بریفنگ لی اور کہا کہ کراچی کو دہشت گردوں اور مجرموں سے پاک کر کے دم لیں گے،رینجرز کو کراچی کے عوام کا اعتماد حاصل ہے۔
آرمی چیف جنرل راحیل شریف نے کراچی پہنچتے ہی رینجرز ہیڈ کوارٹر میں بریفنگ لی۔ ڈی جی رینجرز میجر جنرل بلال اکبر نے آرمی چیف کو اویس شاہ کے اغوا اور امجد صابری کے شہادت سے متعلق پیش رفت پر بریفنگ دی، امن و امان کی صورتحال سے آگاہ کیا، بریفنگ میں کور کمانڈر کراچی اور ڈی جی آئی ایس آئی بھی موجود تھے۔
آرمی چیف جنرل راحیل شریف کا کہنا تھا کہ دہشت گردوں کے سہولت کاروں کو پناہ نہیں ملے گی کراچی کے چپےچپےمیں امن یقینی بنایاجائےگا، کراچی کو دہشت گردوں اور مجرموں سے پاک کرکے دم لیں گے،دہشت گردوں کےخلاف بلا امتیاز آپریشن یقینی بنایا جائے گا، سندھ رینجرز کو کراچی کے عوام کا مکمل اعتماد حاصل ہے۔
آرمی چیف نے رینجرزکے کردار اور خدمات کو قابل قدر قرار دیتے ہوئے کہا کہ رینجرز کو اپنے مشن کی تکمیل کے لیے سہولتیں فراہم کی جائیں گی۔
