راولپنڈی: آرمی چیف جنرل قمر جاوید باجوہ نے یوم آزادی کے موقع پر لائن آف کنٹرول کا دورہ کیا اور جوانوں سے ملاقاتیں کیں۔
پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ نے یوم آزادی کے موقع پر لائن آف کنٹرول کا دورہ کیا اور جوانوں سے ملاقاتیں کیں۔
آرمی چیف کو لائن آف کنٹرول کی خلاف ورزی اور پاکستانی جواب سے متعلق بریفنگ دی گئی۔
آرمی چیف نے بھارتی سیز فائر کی خلاف ورزی پر پاک فوج کے رد عمل کو سراہا۔
اس موقع پر آرمی چیف کا کہنا تھا کہ بھارتی فوج کا کشمیریوں پر جبر جدوجہد آزادی کا عزم کم نہیں کر سکتا۔ انہوں نے کہا کہ کشمیریوں کی جدوجہد کے ساتھ کھڑے ہیں۔ کشمیریوں کی ریاستی جبر کے خلاف جدوجہد کی حمایت کرتے رہیں گے۔
انہوں نے کہا کہ مادر وطن کا دفاع کرتے ہوئے یوم آزادی منانا بہترین عمل ہے۔ پاک فوج صرف بھارتی اشتعال انگیزی پر ہی جواب دیتی ہے۔
آئی ایس پی آر کے مطابق آرمی چیف کے دورے کے موقع پر کور کمانڈر راولپنڈی لیفٹیننٹ جنرل ندیم رضا بھی ان کے ہمراہ تھے۔
