ناریل قدرت کی جانب سے دیا گیا ایسا خاص تحفہ ہے جسے کھایا بھی جاتا ہے پیا بھی جاتا اور اسے تیل کی صورت میں لگایا بھی جاتا ہے۔
ماہرین صحت کے مطابق ناریل کا پانی کئی دیگر غذائی اجزاء جیسے کیلشیم، میگنیشیم، پوٹاشیم اور فاسفورس سے بھرپور ہوتا ہے، اس میں سے ہر ایک میں ہڈیوں کی صحت، خلیوں کی صحت اور بڑھاپے میں صحت مند رہنے کے فوائد حاصل ہوتے ہیں۔
اے آر وائی نیوز کے پروگرام باخبر سویرا میں ماہر غذائیت ڈاکٹر اریج ہارون نے ناریل کے تیل کے بے شمار فوائد بیان کیے اور اسے استعمال کرنے کے مختلف طریقے بتائے۔
انہوں نے بتایا کہ ناریل کے تیل میں سب کچھ ہے اسے کھانے بنانے کیلئے، اسکن کیلئے ہڈیوں کیلئے ناخنوں کے علاوہ میک اپ اتارنے کیلئے بھی استعمال کیا جاسکتا ہے۔ ناریل کا پانی بھی صحت کے لئے بے حد مفید ہے کیونکہ اس سے ہڈیوں اور دانتوں کی صحت بہتر بنانے میں مدد ملتی ہے۔
ان کا کہنا تھا کہ کھوپرے کا تیل چہرے پر لگانے سے جلد کی لچک بحال ہوجاتی ہے اور جھریاں نہیں ہوتیں۔ اس کے علاوہ ناریل کے پانی میں چند قطرے لیموں ملاکر اس کا ماسک لگانے سے جلد خشک ہونے کا مسئلہ دور ہوجائے گا۔
کھوپرے کے تیل سے دن میں دو مرتبہ غرارے کرنے سے دانت صحت مند رہتے ہیں، اس تیل سے نہ صرف دانتوں میں موجود ٹاکسن ختم ہوتا ہے بلکہ یہ دانتوں کی حساسیت کم کرنے میں بھی مفید ہے۔
ناریل کے تیل کو مساج کے دوران استعمال کرنے سے بہت سکون ملتا ہے، اس کے علاوہ یہ ہڈی و جوڑوں کے درد کے شکار افراد کے لیے بھی مفید ثابت ہوسکتا ہے اس کے علاوہ یہ ورزش سے پہلے اور بعد کے لیے بھی بہترین مشروب ہے۔
