اسلام آباد (11 فروری 2026): جاتی سردی دوبارہ لوٹ آئی بالائی علاقوں میں برف باری نے پہاڑوں کو ایک بار پھر سفید چادر اوڑھا دی۔
گزشتہ ماہ شدید ترین سردی کے بعد موسم معتدل ہونا شروع ہوا تھا کہ شمالی علاقہ جات میں بارش اور پہاڑوں پر برف باری سے جاتی سردی ایک بار پھر لوٹ آئی ہے۔
جاتے جاتے سردی نے دوبارہ آ کر قدرتی مناظر کو ایک بار پھر دلکش روپ دے دیا ہے۔ بالائی علاقوں میں برفباری نے وادیوں کو سفید چادر میں لپیٹ دیا ہے، جیسے پہاڑ اور درخت برف کے موتیوں سے سج گئے ہوں۔
مانسہرہ کے میدانوں میں ہلکی بارش نے فضاؤں کو خوشگوار اور تازگی سے بھر دیا ہے۔ شوگران، ناران اور کاغان میں سفید برف نے قدرتی جنت کی تصویر پیش کی۔ مری، گلیات، ایوبیہ، نتھیا گلی اور ٹھنڈیانی میں رات کے وقت برف نے ماحول کو جادوئی بنا دیا ہے۔
اسلام آباد سمیت دیگر شہروں میں بارش نے سردی کو بڑھا دیا ہے۔ پشاور میں وقفے وقفے سے ہونے والی بارش نے شہری زندگی میں بھی موسم کی تازگی گھول دی ہے۔
کراچی میں چند روز موسم گرمی کی طرف جاتے جاتے پلٹ آیا ہے اور آج شہر قائد میں ٹھنڈی ہوائیں چل رہی ہیں، جس کے بعد بیشتر افراد نے گرم کپڑے دوبارہ نکال لیے ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں