لاہور: صوبہ پنجاب کے دارالحکومت لاہور کی عدالت نے شیخوپورہ کے تاریخی باغ میں دکانوں کی تعمیر سے روک دیا، عدالت نے فریقین کو بھی نوٹس جاری کردیا ہے۔
تفصیلات کے مطابق لاہور ہائی کورٹ میں شیخوپورہ کے کمپنی باغ کی تاریخی حیثیت کو ختم کرنے کے کیس کی سماعت ہوئی، جسٹس شاہد وحید نے شہری یاسر خان کی درخواست پر سماعت کی۔
درخواست میں مؤقف اختیار کیا گیا کہ کمپنی باغ مغل بادشاہ جہانگیر کے دور حکومت میں تعمیر کیا گیا، انگریز کے دور میں کمپنی باغ کی حیثیت کو برقرار رکھا گیا۔ تاہم اب قانونی تقاضے پورے کیے بغیر کمپنی باغ میں ماڈل بازار بنا دیا گیا ہے۔
درخواست میں استدعا کی گئی کہ عدالت کمپنی باغ کی تاریخی حیثیت کو بحال کرنے کا حکم دے۔
سماعت کے بعد عدالت نے انتظامیہ کو کمپنی باغ میں دکانوں کی تعمیر سے روک دیا، عدالت نے فریقین کو نوٹس جاری کر کے 10 فروری کو جواب طلب کیا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں