اسلام آباد : اسلام آباد ہائی کورٹ نے متنازع ٹوئٹ کیس میں پی ٹی آئی سینیٹر اعظم سواتی کو ضمانت پر رہا کرنے کا حکم دے دیا۔
تفصیلات کے مطابق اسلام آباد ہائی کورٹ کے چیف جسٹس عامرفاروق نے متنازع ٹوئٹ کیس میں پی ٹی آئی کے سینیٹر اعظم سواتی کی درخواست ضمانت پر محفوظ فیصلہ سنادیا۔
اسلام آباد ہائیکورٹ نےاعظم سواتی کی ضمانت بعد از گرفتاری منظور کرتے ہوئے 2لاکھ روپے مچلکےجمع کرانے کی ہدایت کردی۔
عدالت نے اعظم سواتی کو ضمانت پر رہا کرنے کا حکم دے دیا، عدالت نے آج صبح دلائل سننے کے بعد فیصلہ محفوظ کیا تھا۔
اسلام آباد ہائی کورٹ کی جانب سے اعظم سواتی کو رہا کرنے کے فیصلے پر پی ٹی آئی رہنما نے کہا کہ جس معاشرے میں انصاف نہیں ہوتا وہ قومیں آگے نہیں بڑھ سکتی، عوام ہی بڑے فیصلے کرسکتی ہے۔
فیصل جاوید کا کہنا تھا کہ اسلام آباد ہائی کورٹ کے فیصلے سے 2023 کا بہترین آغاز ہوا ہے، ہم نے انصاف کےلیے جنگ جاری رکھنی ہے ، امیر غریب سب کو انصاف ملنا چاہیے۔
تحریک انصاف کے رہنما شہزادوسیم نے اسلام آباد ہائی کورٹ کےججز کو خراج تحسین پیش کرتے ہوئے کہا کہ جنہوں نے حق پر فیصلہ دیا ، ذات،انا سے بالاتر ہوکر ملکی بہتری کےلیے کردار اداکرنا چاہیے۔
