کویت: وزارتِ اقتصادی امور کی جانب سے کرونا بحران سے متاثر ہونے والے شہریوں کی مدد کے لیے ایک خصوصی ایپ جاری کر دی گئی ہے۔
تفصیلات کے مطابق کویت کی وزیر سماجی امور اور وزیر مملکت برائے اقتصادی امور مریم العقیل نے کرونا بحران سے متاثر شہریوں کے مسائل کے حل کے لیے اسپیشل ایپ ’کویتیون بلا رواتب‘ جاری کی ہے۔
مریم العقیل کا کہنا تھا کہ اس خصوصی ایپ کے ذریعے کویت میں نادار شہریوں کی مدد کی جائے گی، ’کویتیون بلا رواتب‘ سے مراد ایسے کویتی ہیں جنھیں تنخواہ نہیں مل رہی ہے۔
خصوصی ایپ پر کرونا بحران سے متاثر ہونے والے نادار کویتیوں کی درخواستوں کی وصولی شروع کر دی گئی ہے۔
اس سے قبل کویتی وزیر مریم العقیل نے ایک بیان میں کہا تھا کہ کویتی حکومت جلد ہی کرونا وبا سے متاثر ہونے والے ہر کویتی شہری کو ای پلیٹ فارم پر رجسٹرڈ ہونے کا موقع فراہم کرے گی۔
کویتی خبر رساں ادارے کے مطابق مریم العقیل نے کہا ہے کہ کویتی شہریوں کی درخواستوں کی جانچ کی جائے گی، جن کے پاس آمدنی کا کوئی ذریعہ نہیں ہوگا ان کی مالی اعانت کی جائے گی، کویتی حکومت کی جانب سے ایسے افراد کے معاشی مسائل حل کیے جائیں گے۔
یہ کہا جا رہا ہے کہ کویت کرونا بحران سے متاثر اپنے نادار شہریوں کے مسائل سائنسی انداز میں انسانی بنیادوں پر حل کرنے کی کوشش کرنے والا دنیا کا پہلا ملک ہے۔
