ریاض: سعودی عرب میں نئے تعمیر ہونے والے کرونا اسپتال کو خراج تحسین کے طور پر خاتون نرس کے نام سے منسوب کردیا گیا جو حالیہ دنوں وبائی مرض سے لڑتے ہوئے جاں بحق ہوگئی تھیں۔
عرب میڈیا کے مطابق کروناوائرس کے خلاف جنگ کے لیے سعودی شہر مدینے میں بدھ کے روز نئے اسپتال کا قیام عمل میں آیا، جو وبائی صورت حال کے تناظر میں شہریوں اور مریضوں کو ہرممکن سہولیات فراہم کررہا ہے۔
رپورٹ کے مطابق نئے اسپتال کو ’نوجود الخیباری‘ کے نام سے منسوب کیا گیا ہے، یہ نام ایک خاتون نرس کا تھا جو مملکت میں کروناوائرس کے خلاف کمربستہ ہوکر اپنے پیشہ ورانہ خدمات انجام دے رہی تھیں۔
سعودی حکومت کی جانب سے اس اقدام کو مقصد اسپتال اور طبی عملے کی حوصلہ افزائی کرنا ہے، جو اپنی زندگی کی پرواہ کیے بغیر شہریوں کی وبا سے حفاظت کرنے کی کوشش کررہے ہیں۔
خیال رہے کہ ’نوجود الخیباری‘ اسپتال کو ہنگامی بنیاد پر صرف 59 دن کے اندر تعمیر کروایا گیا ہے، جہاں ابتدائی طور پر کرونا مریضوں کے لیے 100 نصب کیے گئے ہیں۔ مدینے کے گورنر نے اسپتال کے قیام میں وزارت توانائی کی جانب سے بھرپور تعاون پر شکریہ ادا کیا اور مستقبل میں بھی ساتھ دینے کے عزم کا اعادہ کیا۔
