لاہور : لاک ڈاؤن کے دوران سابق کھلاڑیوں نے بھی کرکٹرز کو آن لائن لیکچرز دینا شروع کردئیے، آن لائن لیکچرز کے دوران جاوید میانداد نے خصوصی طور پر ڈینس للی کا سامنا کرنے کے بارے میں بتایا۔
تفصیلات کے مطابق دنیا بھر میں کرونا وائرس کی جان لیوا وبا کا پھیلاؤ روکنے کےلیے لاک ڈاؤن جاری ہے جس کے باعث کھیلوں کی سرگرمیاں بھی متاثر ہوگئی ہیں لیکن پاکستان کے سابق کرکٹرز نے موجودہ کھلاڑیوں کی آن لائن تربیت کا سلسلہ شروع کردیا ہے۔
ذرائع کا کہنا ہے کہ پاکستان کرکٹ بورڈ نے 45 کرکٹرز کو لیکچرز دینے کا سلسلہ شروع کیا ہے، سابق کپتان جاوید میانداد نے بیٹسمنینوں کو ویڈیو لنک پر لیکچر دیا۔
جاوید میانداد نے بیٹسمینوں کو اپنے تجربات اور خوشگوار واقعات سے آگاہ کیا جبکہ خصوصی طور پر ڈینس للی کا سامنا کرنے کے بارے میں بھی بتایا، سابق کھلاڑیوں نے کھلاڑیوں کو انگلینڈ کی کنڈیشنز کے مطابق کھیلنے کے گُر بتائے۔
محمد حفیظ، بابر اعظم اور امام الحق سمیت کئی کرکٹرز نے سابق لیجنڈری بیٹسمین سے سوالات کیے، جس پر جاوید میانداد نے کہا کہ بابراعظم تم اچھا کھیل رہے ہو اسی طرح کھیلتے رہو جبکہ امام الحق کو دباؤ نہ لینے کی ہدایت کی۔
ذرائع کا کہنا ہے کہ آن لائن لیکچرز کے پہلے سیشن میں ہیڈ کوچ مصباح الحق اور بولنگ کوچ وقار یونس بھی شریک ہوئے جبکہ دوسرے سیشن میں وسیم اکرم فاسٹ باؤلرز کو لیکچرز دیں گے۔
