ریاض: سعودی عرب میں توکلنا ایپ پر کرونا اسٹیٹس میں جعل سازی کرنے والے ایک گروہ کو گرفتار کر لیا گیا ہے، جعل سازی میں سرکاری اہل کار بھی شامل تھے۔
تفصیلات کے مطابق کنٹرول اینڈ اینٹی کرپشن کمیشن کے ذرائع نے کہا ہے کہ توکلنا ایپ میں رشوت لے کر اسٹیٹس تبدیل کرنے کے الزام میں ادارہ امور صحت کے 2 اہل کاروں سمیت متعدد ایجنٹس اور جعل سازی میں ملوث شہریوں و غیر ملکیوں کو حراست میں لے لیا گیا ہے۔
سعودی ذرائع ابلاغ کے مطابق کمیشن کی تحقیقاتی کمیٹی نے سوشل میڈیا پر وائرل ہونے والے جعل سازی کے ایک اشتہار کے بعد کارروائی کی تھی، جس میں رقم کے عوض ’توکلنا‘ ایپ پر کرونا کے حوالے سے اسٹیٹس کو تبدیل کرنے کی پیش کش کی گئی تھی۔
گرفتار جعل سازوں میں مشرقی ریجن کے ادارہ امور صحت کے 2 اہل کاروں کے علاوہ 6 سعودی شہری،3 یمنی جب کہ ایک شامی باشندہ شامل ہیں، ملزمان کے خلاف جعل سازی کا مقدمہ درج کر کے انھیں تحقیقاتی ادارے کے سپرد کر دیا گیا ہے۔
رپورٹ کے مطابق یہ جعل ساز توکلنا ایپ پر کرونا ویکسین کے حوالے سے اسٹیٹس کو تبدیل کر دیتے تھے، جس سے یہ ظاہر ہوتا تھا کہ مذکورہ شخص کو ویکسین لگائی جا چکی ہے، بتایا گیا ہے کہ جعل سازی میں ملوث ادارہ امور صحت کے 2 اہل کاروں میں سے ایک ملزم ویکسینیشن سینٹر کا ملازم تھا۔
