The news is by your side.

Advertisement

60 سال سے زائد عمر کے شہریوں کی کرونا ویکسی نیشن کا آغاز ہو گیا

اسلام آباد: وفاقی دارالحکومت میں 60 سال سے زائد عمر کے شہریوں کی کرونا ویکسی نیشن کا آغاز ہو گیا۔

تفصیلات کے مطابق اسلام آباد میں معمر شہریوں کی کرونا ویکسی نیشن شروع ہو گئی، تاہم ویکسی نیشن سینٹرز میں آج پہلے روز بزرگ شہریوں کو مسائل کا سامنا کرنا پڑا۔

وزارت قومی صحت نے اپنے بیان میں کہا ہے کہ اسلام آباد میں 15 ویکسی نیشن سینٹرز قائم ہیں، اور آج پہلے روز کے لیے 500 شہری رجسٹرڈ ہیں، اب تک پہلے روز 188 شہریوں کی ویکسی نیشن ہو چکی ہے۔

وزارت صحت نے بتایا کہ وقت کی پابندی نہ کرنے پر شہریوں کو مشکلات کا سامنا کرنا پڑا ہے، نادرا کے میسج پر درج وقت کی پابندی سے بہ آسانی ویکسی نیشن کی جا سکتی ہے۔

وزارت قومی صحت کے حکام کا کہنا ہے کہ 60 سال سے زائد عمر کے افراد کو چین کی سائنو فام ویکسین لگائی جا رہی ہے۔

آج وزیر صحت پنجاب ڈاکٹر یاسمین راشد نے ایک بیان میں کہا ہے کہ 65 سال کی عمر سے زائد افراد کو ویکسین کے لیے رجسٹریشن کرانے کا کہا گیا تھا، ان شاء اللہ کل سے لوگوں کو ویکسین لگانا شروع کر دیں گے۔

ڈاکٹر فیصل کے مطابق کرونا ویکسی نیشن کے دوسرے مرحلے کا آغاز آج سے ہو گیا ہے، جس میں سینئر سٹیزنز کو ویکسین لگائی جا رہی ہے، سینئر سٹیزنز کو ویکسین کے لیے ایس ایم ایس بھیجا جا رہا ہے۔

Comments

یہ بھی پڑھیں