ریاض : کورونا وائرس کی روک تھام کے لیے دنیا بھر میں فیس ماسک کے استعمال پر زور دیا جاریا ہے اور زیادہ تر ممالک میں لازمی قرار دیا جاچکا ہے جبکہ عالمی ادارہ صحت نے بھی ماسک پہننے کا مشورہ دیا ہے۔
فیس ماسک کا استعمال صحت مند شخص کو اس وبا سے محفوظ رکھنے میں مدد دے سکتا ہے مگر اکثر افراد جب فیس ماسک استعمال کرتے ہیں تو ایسی غلطیاں کرتے ہیں جو انہیں وائرس کا شکار بناسکتی ہیں۔
اس حوالے سے سعودی وزارت صحت کے ترجمان ڈاکٹرمحمد العبد العالی نے کہا ہے کہ فیس ماسک کورونا وائرس سے بچانے کے لیےاہم ذریعہ ہے اس لیے ماسک پہننا افراد اور معاشرے دونوں کے لیے مفید ہے اور کسی کے لیے نقصان دہ نہیں۔
ترجمان وزارت صحت کا کہنا ہے کہ فیس ماسک اس طرح اتارا جائے کہ یہ آنکھ ناک اور منہ پر نہ لگے، دستانے اور ماسک کو اتارنے کے بعد درست طریقے سے تلف کیا جائے۔
سعودی ذرائع ابلاغ کے مطابق وزارت صحت کے ترجمان نے بدھ کو نئے کورونا وائرس کی تازہ صورتحال سے متعلق بریفنگ دیتے ہوئے کہا کہ بہت سارے پیشے ایسے ہیں جن میں ایک عرصے تک ماسک پہننا ضروری ہے، ان پیشوں میں صحت کے امور کے شعبے بھی شامل ہیں۔
انہوں نے کہا کہ گزشتہ کئی عشروں سے لوگ ڈیوٹی کے دوران ماسک پہنتے آرہے ہیں، اب تک ماسک پہننے کی وجہ سے کہیں اور کبھی صحت عملے کے لیے ماسک کا کوئی نقصان ریکارڈ پر نہیں آیا ہے۔
وزارت صحت کے ترجمان نے تنبیہ کی ہے کہ جو معاشرے صحت ضوابط اور حفاظتی تدابیرکی پابندی نہیں کررہے ہیں اور وہاں حفاظتی تدابیر کے بغیر زندگی کے معمولات بحال کردیے گئے ہیں، اس قسم کے معاشروں میں وبا دوبارہ پھیلنے لگی ہے۔
