The news is by your side.

Advertisement

کورونا وائرس : جاپانی حکومت نے نئے قانون کی منظوری دے دی

ٹوکیو : جاپان کی مرکزی کابینہ نے ملک میں کورونا وائرس کی وباء سے زیادہ مؤثر انداز میں نمٹنے میں مدد کے لیے کچھ قوانین کے مسودوں کی منظوری دی ہے۔

اس حوالے سے غیر ملکی خبر رساں ادارے کا کہنا ہے کہ منظور ہونے والے قوانین میں کورونا وائرس سے نمٹنے کے خصوصی قانون، متعدی امراض پر کنٹرول کے قانون اور قرنطینہ قانون پر نظرثانی کی تجاویز جمعے کے روز کابینہ کے اجلاس میں منظور کرلی گئیں۔

نظرثانی کے مسودے میں وائرس سے نمٹنے کے اقدامات پر عمل سے انکار کرنے والے افراد اور اداروں پر جرمانہ شامل ہے۔

منظور ہونے والے ترمیم شدہ مسودے کے تحت کورونا وائرس سے نمٹنے کے خصوصی قانون کے ذریعے گورنروں کو مرکزی حکومت کی جانب سے ہنگامی حالت کے نفاذ سے قبل بھی زیادہ اختیارات حاصل ہوں گے۔

اس کے علاوہ مذکورہ گورنرز کاروباری اداروں کو ان کے اوقات کار تبدیل کرنے کا کہہ سکیں گے اور کہنا نہ ماننے کی صورت میں گورنر احکام پر عملدرآمد کا حکم جاری کر سکیں گے۔ اس کے ساتھ انہیں موقع پر جائزہ لینے کا اختیار بھی حاصل ہوگا۔

قانون میں کہا گیا ہے کہ احکامات نہ ماننے والے کاروباری اداروں پر ہنگامی حالت نافذ ہونے کی صورت میں زیادہ سے زیادہ تقریباً 5 ہزار ڈالر جبکہ ہنگامی حالت کے بغیر کی صورت میں زیادہ سے زیادہ تقریباً 3 ہزار ڈالر تک جرمانہ کیا جاسکے گا۔

ذرائع کے مطابق گورنر کے دورے کے موقع پر جائزے کو مسترد کرنے والوں کو زیادہ سے زیادہ تقریباً 2 ہزار ڈالر تک جرمانہ کیا جاسکے گا۔

Comments

یہ بھی پڑھیں