نئی دہلی : بھارت میں کورونا متاثرین بیت الخلا میں رہنے پر مجبور ہوگئے، انتطامیہ کی نااہلی کے باعث مزدوروں کیلئے رہنے کی کوئی جگہ نہیں۔
تفصیلات کے مطابق کورونا لاک ڈاؤن کی وجہ سے بھارت کی مختلف ریاستوں سے تعلق رکھنے والے مزدوروں کی آمدورفت کا سلسلہ جاری ہے، کچھ مزدور راج گڑھ سے واپس آئے تھے جنہیں چیک آپ کے بعد مقامی اسکول میں قرنطینہ کیا گیا۔
بھارتی ریاست مدھیہ پردیش کے ضلع گُنا کے تحصیل راگھو گڑھ کے دیوی پورہ گاؤں میں راج گڑھ سے واپس آنے والے مزدور میاں بیوی کو طبی معائنے کے بعد انتہائی نامناسب جگہ پر رکھا گیا۔
مقامی سرپنچ اور سکریٹری کی عدم توجہی کی وجہ سے بعض مزدوروں کو اسکول کے ٹوائلٹ میں ہی رہنا پڑ رہا ہے، یہ مزدور جوڑے جب ضلع گونا کی تحصیل راگھوگڑھ کے دیوی پورہ گاؤں پہنچے تو چیک آپ کے بعد انہیں اسکول کے بجائے بیت الخلا میں قرنطینہ کیا گیا۔
واقعے کی اطلاع جب سب ڈویژنل افسر راگھو گڑھ کو ہوئی تو انہوں نے فورا اس معاملے کا نوٹس لیتے ہوئے میاں بیوی کو اسکول بھجوایا اور واقعے تحقیقات کا حکم دیا۔
