بیجنگ / واشنگٹن: دنیا بھر میں جان لیوا کرونا وائرس سے متاثر افراد کی تعداد 85 ہزار ہوچکی ہے، وائرس سے ہلاک افراد کی تعداد 3 ہزار جبکہ مختلف ممالک میں وائرس سے متاثر 42 ہزار افراد صحتیاب بھی ہوچکے ہیں۔
غیر ملکی میڈیا کے مطابق چین میں گزشتہ روز مزید 47 افراد وائرس سے ہلاک ہوگئے جس کے بعد اموات کی تعداد 2 ہزار 70 ہوگئی ہے۔ ہفتے کے روز کرونا وائرس کے مزید 573 کیس رپورٹ ہوئے جس کے بعد وائرس سے متاثرین کی مجموعی تعداد 79 ہزار 251 ہوگئی ہے۔
چین میں گزشتہ روز وائرس سے متاثر 2 ہزار 623 افراد علاج کے بعد اسپتالوں سے ڈسچارج کردیے گئے، ملک بھر میں اب تک 41 ہزار 625 وائرس کا شکار افراد صحتیاب ہوچکے ہیں۔
جنوبی کوریا میں کرونا وائرس کے مزید 813 کیس رپورٹ ہوئے جس کے بعد مریضوں کی مجموعی تعداد 3 ہزار 150 ہوگئی، جنوبی کوریا میں وائرس سے اموات کی تعداد 17 ہوگئی ہے۔ حکام نے لوگوں کو گھروں میں رہنے کی ہدایت کی ہے۔
قطر میں بھی کرونا وائرس کا پہلا کیس سامنے آگیا، عراق میں مزید 5 کیسز سامنے آگئے۔ ایران میں اب تک 43 افراد ہلاک ہوچکے ہیں جبکہ مجموعی طور پر وائرس سے متاثر افراد کی تعداد 543 ہوگئی ہے۔
ادھر اٹلی میں کرونا وائرس سے اموات کی تعداد 29 ہوگئی جبکہ کرونا وائرس کے مریضوں کی تعداد 1 ہزار سے تجاوز کر گئی۔ فرانس میں بھی متاثرین کی تعداد 100 سے تجاوز کر گئی۔
امریکا میں کرونا وائرس کے باعث پہلی ہلاکت نے حکام میں تشویش کی لہر دوڑا دی ہے۔ دارالحکومت واشنگٹن میں 50 سالہ خاتون کرونا وائرس کا شکار ہونے کے بعد جان کی بازی ہار گئیں۔ امریکا میں کرونا کے مزید 3 کیسز رپورٹ ہوئے ہیں جس کے بعد مریضوں کی تعداد 66 ہوگئی ہے۔
چین سمیت دنیا بھر میں کرونا وائرس سے اب تک 3 ہزار ہلاکتیں ہوچکی ہیں۔
