حیدر آباد: صوبہ سندھ کے شہر حیدر آباد میں کرونا وائرس کے پھیلاؤ میں اضافہ دیکھنے میں آرہا ہے، گزشتہ 24 گھنٹوں کے دوران کرونا وائرس کے مزید 69 کیسز رپورٹ ہوئے ہیں۔
تفصیلات کے مطابق صوبہ سندھ کے شہر حیدر آباد میں گزشتہ 24 گھنٹوں کے دوران کرونا وائرس کے مزید 69 کیسز رپورٹ ہوئے ہیں۔
محکمہ صحت کا کہنا ہے کہ گزشتہ 24 گھنٹے کے دوران 459 ٹیسٹ کیے گئے، گزشتہ روز شہر میں کرونا وائرس کے باعث مزید 2 افراد کا انتقال ہوگیا۔
خیال رہے کہ نیشنل کمانڈ اینڈ آپریشن سینٹر نے حیدر آباد میں کرونا وائرس کیسز میں اضافے پر تشویش کا اظہار کیا تھا۔
صرف حیدر آباد ہی نہیں ملک بھر میں کرونا وائرس کی دوسری لہر کے پھیلاؤ کے بعد کوویڈ کیسز میں اضافہ دیکھنے میں آرہا ہے، ملک میں کرونا وائرس کے مصدقہ کیسز کی تعداد 3 لاکھ 63 ہزار 380 ہوچکی ہے۔
صرف گزشتہ 24 گھنٹوں کے دوران ملک بھر میں 2 ہزار 208 کرونا کیسز رپورٹ ہوئے ہیں۔
گزشتہ روز کرونا وائرس کے مزید 37 مریض جاں بحق ہوئے جس کے بعد کرونا سے مجموعی اموات کی تعداد 7 ہزار 230 ہوگئی ہے۔
ملک میں کوویڈ 19 کے فعال کیسز کی تعداد 30 ہزار 362 ہے جن میں سے 1 ہزار 551 مریضوں کی حالت تشویش ناک ہے۔ اب تک 3 لاکھ 25 ہزار 788 افراد کوویڈ 19 سے صحت یاب ہوچکے ہیں۔
