ریاض: سعودی فرمانروا شاہ سلمان بن عبدالعزیز نے عالمی ادارہ صحت کو کورونا وائرس سے بچاؤ کے لیے ایک کروڑ امریکی ڈالر امداد دینے کا اعلان کردیا۔
غیرملکی خبررساں ادارے کی رپورٹ کے مطابق عالمی ادارہ صحت کی جانب سے دنیا بھر میں کورونا وائرس سے بچاؤ کے لیے مالی معاونت کی اپیل کی گئی تھی جس کے بعد شاہ سلمان بن عبدالعزیز نے فوری طور پر ایک کروڑ ڈالر امداد فراہم کرنے کے احکامات جاری کردئیے۔
ایوان شاہی کے مشیر اور شاہ سلمان امدادی سینٹر برائے ہیومن ایڈ ڈاکٹر عبداللہ الربیعہ کا کہنا ہے کہ شاہ سلمان نے انسانی ہمدردی کی بنیاد پر عالمی ادارہ صحت کی جانب سے کی گئی امدادی اپیل کا فوری جواب دیتے ہوئے رقم فراہم کرنے کے احکامات جاری کیے ہیں تاکہ بنی نوع انسان کی فلاح و بہبود کے منصوبے پر فوری عملدرآمد کیا جاسکے۔
Very grateful to @KingSalman, Crown Prince Mohammed bin Salman & the people of 🇸🇦 for pledging USD 10M to @WHO for the implementation of urgent measures to minimize the spread of #COVID19 & to support countries with vulnerable health infrastructures.https://t.co/qrOhgy5Ghh
— Tedros Adhanom Ghebreyesus (@DrTedros) March 9, 2020
ڈاکٹر الربیعہ نے شاہ سلمان بن عبدالعزیز اور سعودی ولی عہد شہزادہ محمد بن سلمان کی تعریف کرتے ہوئے اس امداد کو بہترین اقدام قرار دیا ہے، ان کا کہنا تھا کہ سعودی عرب اور عالمی ادارہ صحت کورونا وائرس سے نمٹنے کے لیے مل کر کام کررہے ہیں۔
دوسری جانب ڈبلیو ایچ او کے ڈائریکٹر جنرل ٹیڈروس ایڈہینم نے سماجی رابطے کی ویب سائٹ ٹویٹر پر کورونا وائرس سے بچاؤ کے لیے امداد فراہم کرنے پر سعودی قیادت کا شکریہ ادا کیا ہے۔
واضح رہے کہ دنیا بھر میں کورونا وائرس کے تصدیق شدہ کیسز کی تعداد ایک لاکھ 660 سے زائد ہوگئی ہے جبکہ اموات کی تعداد 3412 سے زائد ہوچکی ہے اور مجموعی طور پر 56 ہزار مریض اب تک صحت یاب ہوئے ہیں۔
