جنیوا: دنیا بھر میں ایک طرف نئے کرونا وائرس نے اپنی ہلاکت خیزی سے تباہی مچائی ہوئی ہے، دوسری طرف ایسے لوگ بھی ہیں جو کرونا وائرس ہی کو نظر انداز کر کے بے فکری سے زندگی گزارتے ہیں۔
ایسے لوگوں کے لیے عالمی ادارہ صحت کے سربراہ ٹیڈروس ایڈھانم نے کہا ہے کہ کرونا وائرس کم زور صحت والوں کو بیمار کرتا ہے، یہ وائرس ان کو بھی نہیں چھوڑتا جو اسے نظر انداز کرتے ہیں، یہ انھیں بھی بیمار کر دیتا ہے۔
ڈبلیو ایچ او کے سربراہ نے جنیوا میں اجلاس سے خطاب میں کہا ہم کرونا وائرس سے لڑتے لڑتے تھک گئے ہیں لیکن وائرس نہیں تھکا۔
اپنے خطاب میں ٹیڈروس ایڈھانم نے نو منتخب امریکی صدر جو بائیڈن اور نائب صدر کمالہ ہیرس کو مبارک باد بھی دی اور کہا ہم نئی امریکی انتظامیہ سے باہمی اعتماد سازی کے ساتھ مل کر کام کے منتظر ہیں۔
تاریخی دن : امریکی کرونا ویکسین کے مثبت نتائج آنا شروع
خیال رہے کہ امریکا اور جرمنی کی دوا ساز کمپنیوں نے اپنی مشترکہ تجرباتی کرونا وائرس کی ویکسین کے 90 فی صد سے زیادہ مؤثر ہونے کا دعویٰ کر دیا ہے۔ امریکی صدر ڈونلڈ ٹرمپ نے اپنے ایک ٹویٹ میں کہا کہ کرونا سے بچاؤ کی ویکسین کی کامیابی دنیا کے لیے بڑی خبر ہے، کرونا سے بچاؤ کی نئی آنے والی ویکسین کے 90 فی صد مثبت نتائج آئے ہیں۔
امریکی فارما کمپنی فائزر نے دعویٰ کیا ہے کہ اس نے کرونا ویکسین کے فیز تھری کا کامیاب تجربہ کیا ہے جس کے 90 فی صد مؤثر نتائج سامنے آئے ہیں، سی ای او فائزر البرٹ برلا کا کہنا تھا کہ آج انسانی تاریخ اور سائنس کے لیے بہت بڑا دن ہے۔
