لاہور: صوبہ پنجاب کے دارالحکومت لاہور میں سی ٹی کی کارروائی میں کالعدم تنظیم کے10دہشت گرد مارے گئے۔
تفصیلات کےمطابق لاہور کے علاقے مناواں میں پولیس کے محکمہ انسداد دہشت گردی کی کارروائی میں مال روڈ دھماکے کے سہولت کار سمیت کالعدم تنظیم کے10 دہشت گرد ہلاک ہوگئے۔
سی ٹی ڈی ترجمان کے مطابق مناواں میں ہونے والی کارروائی کے دوران ہلاک ہونے والے دہشت گردوں میں لاہور کے مال روڈ پر خودکش حملے کا سہولت کار بھی شامل تھا۔
ترجمان محکمہ انسداد دہشت گردی کےمطابق کہ لاہور سےایک ٹیم اسلحہ وبارود برآمد کرنے کے لیے مال روڈ دھماکے کے سہولت کار انوارالحق سمیت پانچ گرفتار مشتبہ افراد کو لے کر نواحی علاقے مناواں جارہی تھی کہ رِنگ روڈ کے نزدیک ان پردہشت گردوں نےفائرنگ کی۔
سی ٹی ڈی کی جوابی فائرنگ میں 10 دہشت گرد ہلاک ہوگئے جن میں انوارالحق،عبداللہ،عطاالرحمان،امام شاہ اور عرفان خان شامل ہیں۔
ترجمان سی ٹی ڈی کےمطابق ہلاک مزید5دہشت گردوں کی شناخت کی جا رہی ہے۔
لاہور دھماکا: ڈی آئی جی ٹریفک اور ایس ایس پی سمیت 13 شہید، 70 زخمی
یاد رہے کہ رواں برس 13 فروری کو لاہور میں پنجاب اسمبلی کے سامنے خودکش دھماکے کے نتیجے میں ڈی آئی جی ٹریفک کیپٹن (ر) احمد مبین اور ایس ایس پی آپریشنز زاہد گوندل سمیت 13 افراد جاں بحق اور 85 زخمی ہوگئے تھے۔
لاہور دھماکا: خودکش بمبار کو افغان بارڈر سے لایا، ملزم کا ویڈیو بیان
واضح رہےکہ مال روڈ دھماکے کےچند روز بعد ہی دھماکے کے مبینہ سہولت کار کو گرفتار کرکے میڈیا کے سامنے پیش کیاگیا تھا۔
