اسلام آباد : جعلی اور غیر رجسٹرڈ ادویات کی روک تھام کیلئے ملک گیر کریک ڈاؤن جاری ہے، ڈرگ کنٹرول ڈپارٹمنٹ اور ایف آئی اے نے آئی ایٹ مرکز میں چھاپہ مار کر غیر قانونی ادویات برآمد کرلیں۔
اس حوالے سے ترجمان وزارت صحت کا کہنا ہے کہ مذکورہ چھاپہ غیر رجسٹرڈ اور اسمگل شدہ ادویات کی اطلاع پر مارا گیا۔
ترجمان نے بتایا کہ چھاپے کے دوران غیر رجسٹرڈ اور ممنوعہ ادویات کی بھاری مقداربرآمد ہوئی ہے، ڈرگ کنٹرول حکام نے برآمد ادویات قبضے میں لے لیں۔
ڈیلیوری آفس سیل کرنے کے بعد ملوث افراد کے خلاف ڈریپ ایکٹ کے تحت مقدمہ درج کرلیا گیا اس کے علاوہ گولڑہ شریف کے علاقے میں بھی غیر رجسٹرڈ ادویات برآمد ہونے پر فارمیسی کو سیل کردیا گیا۔
ترجمان وزارت صحت نے بتایا کہ ایک فارمیسی کو ادویات کی وارنٹی نہ دکھانے پراس کا اسٹاک قبضے میں لے لیا گیا۔
وزیر صحت عبدالقادر پٹیل نے میڈیا سے گفتگو کرتے ہوئے کہا کہ ملک بھر سے جعلی اور غیررجسٹرڈ ادویات کا خاتمہ ہماری اولین ترجیح ہے۔
انہوں نے کہا کہ مقررہ سے زائد قیمت پر ادویات فروخت کرنے والوں کے خلاف سخت قانونی کارروائی کی جائے گی، عوام کو معیاری ادویات کی بلاتعطل فراہمی کو یقینی بنائیں گے۔
مزید پڑھیں : ڈریپ کراچی کا فیکٹری پر چھاپہ، غیرمعیاری ادویات برآمد
عبدالقادر پٹیل نے مزید کہا کہ پاکستان کو جعلی اور غیر معیاری ادویات کی لعنت سے پاک کریں گے، شعبہ صحت میں بہتری کیلئے عملی اقدامات یقینی بنائے جا رہے ہیں۔
