لاہور : اسپیشل سینٹرل عدالت نے وزیراعظم کے بیٹے سلیمان شہباز کے ملکیتی اثاثے قرق کردیے اور 13 کمپنیوں میں حصص سمیت 29 بینک اکاؤنٹس بھی قرق کرنے کا حکم دیا۔
تفصیلات کے مطابق اسپیشل سینٹرل عدالت لاہور نے منی لانڈرنگ کیس میں گزشتہ سماعت کا 9 صفحات کا تحریری فیصلہ جاری کردیا۔
فیصلے میں عدالت نے وزیراعظم کے بیٹے سلیمان شہباز کی ملکیتی اثاثے قرق کردیے اور کہا سلیمان شہباز کی چنیوٹ میں 200کنال زرعی اراضی قرق کردی ہے۔
تحریری حکم میں کہا گیا کہ چنیوٹ میں زرعی اراضی پرڈسٹرکٹ ریونیو افسر کو الگ سے مراسلہ جاری کیا گیا۔
عدالت نے سلیمان شہباز کے 13 کمپنیوں میں حصص اور29 بینک اکاؤنٹس بھی قرق کرنے کا حکم دیتے ہوئے کہا تفتیشی افسر سیلمان شہباز کی دیگر جائیداد کی تفصیلات بھی عدالت میں جمع کرائے۔
تحریری حکمنامے میں کہا ہے کہ اشتہاری ملزم طاہر نقوی کے ایک کمپنی میں 5ہزارحصص بھی قرق کردیے گئے۔
عدالتی حکم میں آئندہ سماعت پرشہبازشریف ،حمزہ شہباز سمیت تمام ملزم کو فرد جرم کارروائی کے لیے پیش ہونے کی ہدایت کرتے ہوئے ،حکم وزیراعظم اور ان کے بیٹے کی ایک روزہ حاضری معافی کی درخواست منظور کرلی۔