The news is by your side.

Advertisement

اپوزیشن لیڈر حلیم عادل شیخ کی درخواستِ ضمانت مسترد

کراچی : انسداد دہشت گردی عدالت نے اپوزیشن لیڈر حلیم عادل شیخ کی درخواست ضمانت مسترد کرتے ہوئے سمیر میر شیخ اور انکے ڈرائیور کی ضمانت منظور کرلی، حلیم عادل شیخ کے خلاف میمن گوٹھ تھانے میں مقدمات درج ہیں۔

تفصیلات کے مطابق انسداد دہشت گردی عدالت نے اپوزیشن لیڈر حلیم عادل شیخ کی دو مقدمات میں درخواست ضمانت پر فیصلہ سنادیا، عدالت نے دونوں مقدمات میں حلیم عادل شیخ کی درخواست ضمانت مسترد کردی۔

حلیم عادل شیخ کے خلاف میمن گوٹھ تھانے میں مقدمات درج ہیں، پولیس کے مطابق حلیم عادل شیخ پر پی ایس 88 کے ضمنی الیکشن کے دوران کار سرکار میں مداخلت سمیت دیگر الزامات ہیں۔

عدالت نے تحریک انصاف کے رہنما سمیر میر شیخ اور انکے ڈرائیور کی ملیر میمن گوٹھ کے دو مقدمات میں ضمانت منظور کرتے ہوئے پچاس پچاس ہزار کے مچلکوں کے عوض سمیر میر شیخ سمیت دو ملزمان کو رہا کرنے کا حکم دے دیا۔

خیال رہے کہ حلیم عادل شیخ کو ضمنی انتخابات کے روز پولیس نے الیکشن کمیشن کے احکامات کی خلاف ورزی پر گرفتار کیا تھا۔

ان کے خلاف میمن گوٹھ تھانے میں دہشت گردی کا مقدمہ درج کیا گیا تھا، پولیس کے مطابق مقدمہ سرکار کی مدعیت میں درج کیا گیا جس میں کار سرکار میں مداخلت، ہنگامہ آرائی اور ہوائی فائرنگ کی دفعات بھی شامل کی گئی ہیں۔

Comments

یہ بھی پڑھیں