The news is by your side.

Advertisement

اسپتال کے کرونا وارڈ میں دل دہلا دینے والا واقعہ

کیلی فورنیا: امریکا میں ایک اسپتال کے کرونا یونٹ میں کو وِڈ 19 کے ایک مریض نے دوسرے مریض کو اچانک حملہ کر کے جان سے مار دیا۔

غیر ملکی میڈیا کے مطابق امریکی ریاست کیلی فورنیا کے علاقے لنکاسٹر کے اینٹی لوپ ویلی اسپتال میں کرونا وائرس میں مبتلا مریض نے دوسرے کرونا مریض کو قتل کر دیا۔

ہول ناک قتل کا یہ واقعہ 17 دسمبر کی صبح کو پیش آیا تھا، پولیس تفتیش کاروں کا کہنا تھا کہ کرونا مریض نے کرونا یونٹ کے اندر دوسرے مریض کو مارا، جس کی عمر 80 سال تھی۔

پولیس کے مطابق کرونا مریض نے معمر شخص پر ایک آکسیجن سلنڈر سے حملہ کیا تھا، حملے کے اگلے دن متاثرہ شخص زخموں کی تاب نہ لاتے ہوئے ہلاک ہو گیا۔

پولیس کا کہنا تھا کہ وارڈ میں زیر علاج دونوں کرونا مریض ایک دوسرے کے لیے اجنبی تھے، اس لیے جان لیوا حملے کی وجہ واضح نہیں ہو سکی ہے۔

واقعے کے بعد ملزم کو قتل کے جرم میں گرفتار کر لیا گیا، مقتول کی عمر کی بنیاد پر قاتل پر اضافی دفعہ بھی لگائی گئی۔

Comments

یہ بھی پڑھیں