عام طور پر بلی اپنے جسم کی صفائی اپنی ہی زبان سے کرتی ہے، بلی کو جسم کے جس حصے کو صاف کرنا ہوتا ہے وہ کافی دیر تک اُسے اپنی زبان سے چاٹتی رہتی ہے۔
یوکرین میں ایک بلی ایسی نواب ہے جو اپنے جسم کی صفائی خود نہیں کرتی بلکہ وہ باڑے آکر بیٹھ جاتی ہے اور پھر وہاں موجود گائیں اُسے چاٹ کر اس کا جسم صاف کرتی ہیں۔
باڑے کے مالک سرگی وسیلوچ نے گائیں اور بلی کی انوکھی دوستی کو دیکھا تو وہ حیران رہ گئے اور پھر انہوں نے اس کی ویڈیو بنا کر شیئر کی تاکہ دیگر لوگ بھی اس منظر کو دیکھ سکیں۔
ویڈیو میں دیکھا جاسکتا ہے کہ بلی باڑے کے پاس جیسے ہی پہنچی ایک گائے نے فوری اپنی زبان سے اُسے چاٹنا شروع کردیا اور پھر دوسری ، تیسری ، چوتھی ، پانچویں گائیں بھی جنگلے کے پاس پہنچ گئیں۔
پانچوں نے اپنے سر جنگلے سے باہر نکالے اور زبان سے بلی کے جسم کو چاٹتی رہیں، اس دوران بلی بالکل خوفزدہ نہیں ہوئی بلکہ وہ اپنے پورے جسم کی خود صفائی کرواتی رہی۔
دو گائیں اُس کے گال چاٹ رہی تھیں، ایک نے دم جب کہ دو درمیانی حصے پر زبان پھیر رہی تھیں۔
مالک کا کہنا ہے کہ ’میں یہ سب دیکھ کر بہت حیران ہوا جس کے بعد میں نے نوٹ کیا کہ بلی روز آتی ہے اور یہ کام روزانہ ہی ہوتا ہے، گائے بھی بلی کو اس لیے چاٹتی ہیں کہ دونوں کے درمیان گہری دوستی ہے‘۔
انہوں نے بتایا کہ اپریل سے اب تک بلی روزانہ باڑے آتی ہے، میں نے اپنی زندگی میں پہلی بار کوئی ایسی بلی دیکھی ہے جو گائے سے خوفزدہ نہیں ہوتی بلکہ اُن سے اپنے کام کرواتی ہے۔ مالک کا کہنا تھا کہ بلی صبح کے وقت آتی ہے ممکن ہے وہ دودھ پینے کےلیے آتی ہو تاکہ ناشتہ کرسکے۔
