ایمسٹرڈیم: ہالی لینڈ کی مقامی کمپنی نے بھکاریوں اور بے گھر افراد کی مدد کے لیے ایسی جیکٹ متعارف کروائی ہے، اس جیکٹ پر کریڈیٹ یا ڈیبٹ کارڈ لگاتے ہی مطلوبہ رقم بے گھر افراد کی فلاحی تنظیم کے بینک اکاؤنٹ میں خود بہ خود منتقل ہوجاتی ہے۔
ترقی پذیر ممالک میں نقد رقم کے استعمال کا سلسلہ کم سے کم ہوتا جارہا ہے جس کے باعث بے گھر اور بھکاری افراد کو خیرات میں ملنے والی رقم روز بہ روز کم ہوتی جارہی ہے، اسی مشکل کو دیکھتے ہوئے ہالینڈ کی کمپنی نے بھکاریوں کے لیے کریڈیٹ کارڈ جیکٹ متعارف کروائی ہے۔
یہ جیکٹ ہالینڈ کی ایڈورٹائزنگ ایجنسی نے بنائی ہے جسے’’ کانٹیکٹ لیس پے منٹ ‘‘ کا نام دیا گیا ہے، اس جیکٹ میں غریب افراد کا اسمارٹ کارڈ اور آگے ایک ایل سی ڈی بھی نصب کی گئی ہے۔
پڑھیں: ’’ فوٹو گرافرز کے لیے کوڈک کا مخصوص فون متعارف ‘‘
جیکٹ ڈیزائن کرنے والے ماہر کا کہنا ہے کہ ’’اس جیکٹ کا خیال اُس وقت ذہن میں آیا کہ جب اکثر لوگوں کو یہ کہتے سُنا کہ ہمارے پاس کھلے پیسے نہیں تاہم کریڈٹ کارڈ موجود ہے، ان باتوں کو مدنظر رکھتے ہوئے جیکٹ کی تیاری شروع کی گئی جس میں کامیابی بھی ملی‘‘۔
جیکٹ ڈیزائنر کے مطابق کسی اجنبی کے ہاتھوں میں جانے والا آپ کا ایک یورو بھی ایسے بینک اکاؤنٹ میں جاتا ہے جس کی رقم غریبوں کے لیے استعمال ہوتی ہے۔ اس کے بدلے اس غریب کو تازہ کھانا، لباس یا شیلٹر ہوم میں ایک رات گزارنے کی مہلت مل جاتی ہے جس کا عموماً کرایہ 5 یورو فی 24 گھنٹے ہوتا ہے۔
مزید پڑھیں: ’’ نوکیا کا کم قیمت خصوصی موبائل متعارف ‘‘
کوئی بھی شخص جب کسی بھکاری کی فریاد سُن کر مدد کے لیے اُس کے پاس پہنچے گا تو اب اُسے کھلے پیسے یا نقد رقم نہ ہونے افسوس نہیں ہوگا کیونکہ وہ جیکٹ پر جیسے ہی اپنا کریڈٹ کا ڈیبٹ کارڈ لگائے گا مطلوبہ رقم فلاحی تنظیم کے اکاؤنٹ میں خود بہ خود منتقل ہوجائے گی۔
جیکٹ پہننے والے کو رقم کے حصول کے لیے ایک بٹن دبانا ہوگا جس کے بعد عطیہ کی جانے والی یہ رقم اُس کی آئی ڈی کے ساتھ بینک اکاؤنٹ میں منتقل ہوجائے گی جسے وہ بعد میں آسانی سے نکال سکے گا۔
