سڈنی: دورہ پاکستان سے متعلق کرکٹ آسٹریلیا کا اہم بیان سامنے آگیا۔
تفصیلات کے مطابق کرکٹ آسٹریلیا کا کہنا ہے کہ وہ آئندہ سال شیڈول دورہ پاکستان کے حوالے سے صورت حال کا جائزہ لے رہے ہیں۔
نیوزی لینڈکا پاکستان آمد کے بعد سیکیورٹی تھریٹ کا بہانہ کرکے اچانک دورے سے دستبردار ہونا اور پھر انگلینڈ کے یہاں آنے سے انکار کے بعد آسٹریلوی ٹیم کے دورے پر بھی سوالیہ نشان لگ گیا ہے۔
اس سلسلے میں نجی ٹی وی سے گفتگو کرتے ہوئے کرکٹ آسٹریلیا کے ترجمان کول ہچکوک نے نے کہا کہ کرکٹ آسٹریلیا صورتحال کا جائزہ لے رہا ہے اور مزید معلومات کے بعد دورے کے حوالے سے متعلقہ حکام سے بات کی جائے گی۔
واضح رہے کہ آسٹریلوی ٹیم نے آخری مرتبہ 1998 میں پاکستان کا دورہ کیا تھا اور اسکے بعد سے پاکستان نے آسٹریلیا کیخلاف اپنی تمام ہوم سیریز نیوٹرل مقامات پر کھیلی ہیں۔
آسٹریلوی کرکٹ ٹیم کو ٹیسٹ، ون ڈے اور ٹی ٹوئنٹی میچز پر مشتمل مکمل سیریز کیلئے اگلے سال فروری مارچ میں پاکستان کا دورہ کرنا ہے۔
