لاہور : سی ٹی ڈی پنجاب نے خفیہ آپریشن کے دوران لاہور سمیت تین شہروں سے بارہ دہشت گرد گرفتار کرلئے، جن کا تعلق القاعدہ اور کالعدم ٹی ٹی پی سے ہے۔
تفصیلات کے مطابق دہشت گردی کے خدشات کے پیش نظر سی ٹی ڈی پنجاب نے بڑی کارروائی کی، سی ٹی ڈی نے خفیہ آپریشن کے دوران لاہور سمیت تین شہروں سے بارہ دہشت گرد گرفتار کرلئے۔
سی ٹی ڈی حکام نے بتایا کہ دہشت گردوں کی نشاندہی اکسٹھ مشتبہ افراد سے تفتیش کے دوران کی گئی، جس کے بعد لاہور سے تین دہشت گردوں کو حساس علاقے کے قریب سے گرفتار کیا گیا، جن کا تعلق القاعدہ اور کالعدم ٹی ٹی پی سے ہے۔
حکام کا کہنا تھا کہ دہشت گردوں سے بارودی مواد اور خودکش جیکٹ بنانےکاسامان برآمد کیا گیا ہے، دہشت گردوں کے نیٹ ورک حساس اضلاع میں تخریب کاری کرنا چاہتے تھے، گرفتار دہشت گردوں کے خلاف مقدمات درج کرکے تفتیش جاری ہے۔
حکام نے بتایا کہ رواں ہفتے سات سو سے زائد کومبنگ اور سرچ آپریشن کیے جن میں ایک سو انسٹھ مشتبہ افراد کو گرفتار کیا گیا۔
سی ٹی ڈی کا کہنا ہے ریاست دشمن عناصرکو کیفر کردارتک پہنچانے میں کوئی کسر نہیں چھوڑی جائے گی۔
