ریاض: سعودی عرب میں اپنی نوعیت کے پہلے قومی جائزے میں مختلف شہروں میں کرنسی نوٹوں کے لین دین کی شرح دیکھی گئی۔
سعودی ویب سائٹ کے مطابق سعودی عرب میں یومیہ سب سے زیادہ کرنسی نوٹ کا لین دین جنوبی علاقے میں ہورہا ہے، یہ بات مملکت میں اپنی نوعیت کے پہلے قومی جائزے میں بتائی گئی ہے۔
رپورٹ کے مطابق جنوبی سعودی عرب کے 48 فیصد باشندے ہر روز کرنسی نوٹ استعمال کرتے ہیں، مملکت کے شمالی اور مغربی علاقوں کے باشندے دوسرے نمبر پر ہیں جہاں کرنسی نوٹ کے استعمال کا تناسب 37 فیصد ہے جبکہ وسطی اور مشرقی علاقوں میں کرنسی نوٹ کا یومیہ لین دین 20 فیصد ہے۔
سعودی مالیاتی ٹیکنالوجی کے قومی جائزے نے اپنی رپورٹ میں بتایا ہے کہ سعودی عرب کے تقریباً 60 فیصد باشندے ہفتے میں کم از کم ایک بار کرنسی نوٹ استعمال کرتے ہیں، چار میں سے ایک شخص کرنسی کا لین دین کرتا ہے۔
رپورٹ میں کرنسی نوٹ کے لین دین کے حوالے سے ایک دلچسپ بات یہ سامنے آئی ہے کہ کرنسی نوٹ کے استعمال میں کمی بیشی کا تعلق عمر سے بھی ہے۔
مثلاً 16 سے 22 سال کی عمر کے 18 فیصد ہر روز، 23 سے 29 سال کی عمر کے افراد 21 فیصد، 30 سے 39 برس والے افراد 23 فیصد، 40 سے 49 برس کی عمر والے افراد 29 فیصد، 50 سے 59 برس کی عمر کے افراد 38 فیصد اور 60 برس اور اس سے زائد عمر کے افراد 46 فیصد یومیہ کرنسی نوٹ کا لین دین کرتے ہیں۔
