کراچی: لسبیلہ کے ساحلی علاقے وندر ڈام کے کھلے سمندر میں ایک کارروائی کے دوران کسٹمز گوادر نے بڑی مقدار میں غیر ملکی شراب پکڑ لی۔
تفصیلات کے مطابق کسٹمز گوادر نے کھلے سمندر میں غیر ملکی شراب کے خلاف بڑی کارروائی میں کروڑوں روپے مالیت کی اسمگل شدہ شراب پکڑ لی۔
کارروائی میں کسٹم گوادر کی معاونت پاکستان نیوی نے کی، لسبیلہ کے ساحلی علاقے وندر ڈام کے کھلے سمندر میں کشتی سے 4 ہزار 600 غیر ملکی شراب کی بوتلیں برآمد کی گئیں، کارروائی میں 5 اسمگلرز بھی گرفتار کر لیے گئے ہیں۔
رپورٹ کے مطابق اسمگلرز شراب کی کھیپ بیرون ملک سے پاکستان اسمگل کرنے کی کوشش کر رہے تھے، برآمد شراب کی مالیت 7 کروڑ روپے بتائی جاتی ہے۔
کلکٹر کسٹم گوادر چودھری جاوید نے بتایا کہ کارروائی خفیہ اطلاعات کی بنیاد پر کی گئی، جس کے لیے کسٹمز حکام کئی دنوں سے ریکی کر رہے تھے، پاکستان نیوی کے اہل کار بھی بڑی مستعدی سے تمام کارروائی میں شریک رہے۔
واضح رہے جب سے کلیکٹر گودار چودھری جاوید نے چارج سنبھالا ہے، گودار کلیکٹریٹ نے شراب سمیت منشیات کے خلاف کئی بڑی کارروائیاں کی ہیں۔
چیف کلیکٹر کسٹمز بلوچستان محمد صادق اور کلیکٹر کسٹمز چودھری جاوید نے ایڈیشنل کلیکٹر کامران علی رانا، ڈپٹی کلیکٹر فرحت اللہ خان، سپرنٹنڈنٹ نثارشیخ، اور ٹیم کو بہترین کارکردگی پر سراہا۔
