محکمہ کسٹم نے منی لانڈرنگ اور ٹیکس چوری پر ایک اور مقدمہ درج کرلیا، حکام کا کہنا ہے کہ مقدمہ ہائی پروفائل ملزم زبیر گھی والا کیخلاف درج کیا گیا ہے۔
کسٹم حکام کے مطابق زبیر گھی والا کی گرفتاری کے لیے کسٹم اینٹیلی جنس کی ٹیم نے بہادرآباد میں کارروائی کی، مقدمے میں نامزد تین ملزمان گرفتار کیے گئے ہیں جبکہ زبیر گھی والا بیرون ملک فرار ہونے میں کامیاب ہوگیا۔
کسٹم ذرائع کا کہنا ہے کہ گرفتار ملزمان میں محمد امین میٹھانی، حذیفہ میٹھانی اور عثمان میٹھانی شامل ہیں،مذکورہ نامزد ملزمان منی لانڈرنگ، اسمگلنگ اور ٹیکس چوری سمیت سنگین جرائم میں ملوث ہیں۔
ملزمان کے خلاف مختلف کمپنیوں کے جعلی کاغذات بنا کر کروڑوں کی کرپشن کا الزام ہے، ملزمان قومی خزانے کو ہزاروں ڈالر کا نقصان پہنچا چکے ہیں۔
ملزم زبیر گھی والا اور محمد امین میٹھانی کے خلاف2019 میں بھی مقدمات درج ہوئے تھے، سال 2019 میں زبیر گھی والے کو ہل پارک کے قریب گھر کے باہر سے گرفتار کیا گیا تھا۔
تاہم ضمانت پر رہائی کے بعد ہائی پروفائل ملزم زبیر گھی والا نے ڈی جی کسٹم سمیت چار کسٹم افسران واہلکاروں کے خلاف مقدمہ درج کروایا تھا۔
