جدہ: محکمہ زکوہ ، ٹیکس اینڈ کسٹم اتھارٹی نے سعودی عرب آنے والے مسافروں کو مطلع کیا ہے کہ مسافر کسٹم قوانین کے تحت اپنی قیمتی اشیا کے بارے میں متعلقہ حکام کو آگاہ کریں۔
ویب نیوز عاجل کے مطابق محکمہ کسٹم کا کہنا ہےکہ مملکت آنے والے مسافروں پرلازم ہے کہ وہ اپنے ساتھ لائی جانے والی ایسی اشیا جن کی مالیت تین ہزار ریال سے زائد ہو اس کے بارے میں محکمہ کسٹم کو مطلع کریں، وہ اشیا جن کی مالیت تین ہزار ریال سے زائد ہوگی ان پر قانون کے مطابق کسٹم وصول کیاجائے گا۔
بیان میں کہا گیا ہے کہ مسافروں کو چاہئے کہ وہ کسٹم ایپ یا ویب سائٹ پر اپنے سامان کے بارے میں دیئے گئے فارم میں اندراج کریں۔
یہ بھی پڑھیں: السعودیہ ایئر لائنز کا اہم اعلان
دوسری جانب ٹریولرز اتھارٹی کی جانب سے مملکت آنے یا جانے والے مسافروں کو قوانین کے بارے میں آگاہ کرتے ہوئے کہا گیا ہے کہ کہ مسافرو ں کے لیے لازمی ہے کہ وہ کسٹم میں ساٹھ ہزار ریال نقد یا اس کے مساوی دیگر کرنسی یا قیمتی دھاتیں جو انکے پاس ہیں ان کے بارے میں بھی محکمہ کسٹم کو آگاہ کریں۔
اتھارٹی کا کہنا تھا کہ وہ مسافر جو اپنے سامان کے بارے میں کسٹم کو آگاہ نہیں کرتے اس صورت میں برآمد ہونے والے سامان کی مجموعی قیمت پر25 فیصد جرمانہ عائد کیاجائے گا۔
عاجل ویب نیوز کے مطاقب دوسری باربھی ایسا ہی عمل دہرائے جانے پر جرمانہ پچاس فیصد کردیاجائے گا اگر مسافر کے بارے میں یہ شک ہو کہ وہ منی لانڈرنگ میں ملوث ہے اس صورت میں اسکا تمام سامان ضبط کرکے کیس پراسیکیوشن کے ادارے کو ارسال کردیاجائےگا۔
