کسٹمز انفورسمنٹ کوئٹہ نے اسمگلنگ کے خلاف دو بڑی کاروائیاں کرتے ہوئے 19 کروڑ روپے مالیت کا ڈیزل اور پرائم موورز ضبط کر لیا۔
کلیکٹر کسٹمز انفورسمنٹ کوئٹہ کی مصدقہ اطلاع پر عمل کرتے ہوئے ٹیم نے دیگر قانون نافذ کرنے والے اداروں کے ساتھ مل کر کوئٹہ اور اس کے اطراف میں دو کامیاب چھاپے مارے۔ کارروائی کے دوران 11 گاڑیاں برآمد کی گئیں جن میں 2 لاکھ 75 ہزار لیٹر اسمگل شدہ ڈیزل موجود تھا، جس کی مالیت تقریباً 15 کروڑ روپے ہے۔
اس کے علاوہ 2 پرائم موورز بھی قبضے میں لیے گئے جن کی مالیت تقریباً 4 کروڑ روپے ہے۔
یہ کارروائیاں کلیکٹریٹ کی اسمگلنگ اور غیر قانونی تجارت کے خلاف جاری کڑی نگرانی اور سخت مہم کا حصہ ہیں۔
برآمد کیے گئے ڈیزل، ٹرک اور پرائم موورز کو تحویل میں لے لیا گیا ہے اور کسٹمز ایکٹ 1969 کے تحت قانونی کارروائی شروع کر دی گئی ہے۔
فیڈرل بورڈ آف ریونیو (FBR) نے کوئٹہ انفورسمنٹ ٹیم کی کامیاب کارروائی کو سراہا اور اسمگلنگ اور غیر قانونی تجارت کے خلاف اپنے عزم کا اعادہ کیا۔
انجم وہاب اے آر وائی نیوز سے وابستہ ہیں اور تجارت، صنعت و حرفت اور دیگر کاروباری خبریں دیتے ہیں